لندن / سڈنی – انگلینڈ کے وکٹ کیپر بیٹر سیم بلنگز نے بگ بیش لیگ (BBL) سیزن 15 میں شرکت کے لیے بھرپور جوش و خروش کا اظہار کرتے ہوئے کہا ہے کہ وہ پاکستانی اسٹار فاسٹ بولر شاہین شاہ آفریدی کا سامنا کرنے کے لیے بے حد پرجوش ہیں۔
سیم بلنگز نے اپنے ایک حالیہ انٹرویو میں کہا:
"شاہین شاہ آفریدی ایک ورلڈ کلاس بولر ہیں۔ ان کے خلاف کھیلنا ہمیشہ ایک چیلنج ہوتا ہے۔ ان جیسے کھلاڑیوں کی موجودگی بی بی ایل جیسے ٹورنامنٹ کے معیار کو مزید بلند کرتی ہے۔”
انہوں نے مزید کہا کہ شاہین نہ صرف میدان میں ایک زبردست حریف ہیں بلکہ ذاتی طور پر ان کے قریبی دوست بھی ہیں، اس لیے ان کے درمیان ہونے والے مقابلے نہ صرف دلچسپ بلکہ خوشگوار ماحول میں ہوں گے۔
بابراعظم کو "کنگ” کا خطاب، ساتھ کھیلنے کی خواہش
اپنی پوڈکاسٹ گفتگو کے دوران سیم بلنگز نے پاکستانی اسٹار بیٹر بابراعظم کی بھی دل کھول کر تعریف کی۔ انہوں نے کہا:
"میں انہیں ‘کنگ بابراعظم’ کہتا ہوں۔ وہ کئی برسوں سے عالمی کرکٹ میں شاندار کارکردگی دکھا رہے ہیں۔ ان کی موجودگی کسی بھی لیگ کو چار چاند لگا دیتی ہے۔”
بلنگز نے انکشاف کیا کہ وہ بابراعظم کے خلاف کئی بار کھیل چکے ہیں، لیکن اب خواہش ہے کہ کسی لیگ میں ان کے ساتھ ایک ہی ٹیم میں کھیلنے کا موقع ملے۔
پاکستانی کرکٹرز کی عالمی پذیرائی
سیم بلنگز کے ان بیانات کو شائقینِ کرکٹ اور ماہرین کی جانب سے سراہا جا رہا ہے، جو پاکستانی کرکٹرز کی بین الاقوامی سطح پر مقبولیت اور عزت کا منہ بولتا ثبوت ہیں۔ شاہین آفریدی اور بابراعظم جیسی شخصیات کی موجودگی عالمی لیگز میں نہ صرف مقابلے کا معیار بڑھاتی ہے، بلکہ نوجوان کھلاڑیوں کے لیے حوصلہ افزائی کا باعث بھی بنتی ہے۔
