یووینٹس کھلاڑیوں سے ملاقات میں صدر ٹرمپ کے غیرمتوقع سوالات، فٹبالرز حیران
واشنگٹن / روم (اسپورٹس ڈیسک) – امریکی صدر ڈونلڈ ٹرمپ کی جانب سے اٹلی کے معروف فٹبال کلب یووینٹس کے کھلاڑیوں سے ملاقات کے دوران کیے گئے غیر روایتی سوالات نے کھلاڑیوں کو حیرت زدہ کر دیا۔ اس ملاقات میں فیفا کے صدر جیانی انفینٹینو بھی شریک تھے۔
وائٹ ہاؤس میں ہونے والی اس خصوصی ملاقات کا مقصد فٹبال اور بین الاقوامی کھیلوں کے فروغ پر بات چیت تھا، تاہم صدر ٹرمپ کی جانب سے بعض غیرمتوقع سوالات نے محفل کا رنگ بدل دیا۔ ذرائع کے مطابق صدر ٹرمپ نے کھلاڑیوں سے پوچھا:
"کیا آپ کی ٹیم میں کسی ٹرانس جینڈر خاتون کو شامل کیا جا سکتا ہے؟ اور کیا انہیں مردوں کے ساتھ مقابلے کی اجازت ہونی چاہیے؟”
اس سوال پر کھلاڑی لمحہ بھر کے لیے خاموش ہو گئے۔ یووینٹس کے نوجوان فٹبالر تیموتھی ویا نے جواب دیتے ہوئے کہا:
"یہ سوال میرے لیے عجیب اور غیر متعلقہ ہے، میں سیاست میں نہیں جانا چاہتا، مجھے صرف فٹبال کھیلنے پر توجہ دینی ہے۔”
یووینٹس کے جنرل مینیجر ڈیمین کومولی نے اس موقع پر محتاط رویہ اختیار کرتے ہوئے صرف اتنا کہا کہ:
"ہمارے پاس خواتین کی اپنی ٹیم موجود ہے، جو علیحدہ سطح پر مقابلے کرتی ہے۔”
ملاقات کے دوران صدر ٹرمپ نے غیر متوقع طور پر ایران-اسرائیل کشیدگی پر بھی بات کی، جس پر کھلاڑی خاموش رہے، تاہم فیفا کے صدر جیانی انفینٹینو نے ملاقات کو "مثبت اور کھیلوں کے لیے خوش آئند” قرار دیا۔
سوشل میڈیا پر شدید ردعمل
صدر ٹرمپ کے سوالات پر سوشل میڈیا صارفین کی جانب سے سخت تنقید کی جا رہی ہے، جہاں صارفین نے اس گفتگو کو "غیر ضروری سیاسی رنگ” دینے کی کوشش قرار دیا۔ کئی اسپورٹس پنڈتوں کا کہنا ہے کہ کھیل کو سیاست سے الگ رکھنا چاہیے، بالخصوص جب بین الاقوامی سطح پر نمائندگی ہو رہی ہو۔
واضح رہے کہ ٹرمپ ماضی میں بھی ٹرانس جینڈر افراد کے حوالے سے متنازع اقدامات کر چکے ہیں، جن میں فوج اور سرکاری اداروں میں ان کی شمولیت پر پابندی شامل ہے۔
