لاہور: پاکستان سپر لیگ (پی ایس ایل) کے شائقین کے لیے خوشخبری! پاکستان کرکٹ بورڈ (پی سی بی) نے لیگ کے آئندہ ایڈیشنز کے انعقاد کے لیے نئی ممکنہ تاریخوں پر غور شروع کر دیا ہے، تاکہ پی ایس ایل کو دیگر بین الاقوامی ٹورنامنٹس سے متصادم ہونے سے بچایا جا سکے۔
میڈیا رپورٹس کے مطابق پی ایس ایل 11 کو دسمبر 2025 سے جنوری 2026 کے درمیان شیڈول کرنے کی تجویز دی گئی ہے، جبکہ پی ایس ایل 12 کے لیے جنوری تا فروری 2027 کی ممکنہ ونڈو زیر غور ہے۔ ان تاریخوں کا مقصد پی ایس ایل کو ایک علیحدہ اور نمایاں مقام دلوانا ہے، جہاں بین الاقوامی کرکٹ کیلنڈر کے باعث رکاوٹیں نہ ہوں۔
ذرائع کا کہنا ہے کہ اگرچہ یہ تاریخیں حتمی نہیں، لیکن ان پر پی سی بی اور متعلقہ اسٹیک ہولڈرز کی مشاورت جاری ہے اور جلد باضابطہ اعلان متوقع ہے۔
ٹیموں کی تعداد بڑھانے اور پشاور میں نمائشی میچز کی تجویز
2026 میں ہونے والے پی ایس ایل کے 11ویں ایڈیشن میں ٹیموں کی تعداد چھ سے بڑھا کر آٹھ کرنے پر بھی سنجیدگی سے غور کیا جا رہا ہے۔ نئی ٹیموں کی شمولیت سے نہ صرف مقابلے کا معیار بڑھے گا بلکہ مداحوں کا جوش و خروش بھی دوگنا ہو جائے گا۔
مزید برآں، پشاور کو نمائشی میچز کی میزبانی دینے کی تجویز بھی زیر غور ہے۔ حالیہ سیزن میں ارباب نیاز اسٹیڈیم کی حالت مکمل نہ ہونے کے باعث وہاں میچز کا انعقاد ممکن نہ تھا، لیکن 2026 میں اسے شیڈول میں شامل کیے جانے کا قوی امکان ہے۔
چیمپئنز ٹرافی کے باعث شیڈول میں رد و بدل
واضح رہے کہ 2025 میں پاکستان کی میزبانی میں ہونے والی چیمپئنز ٹرافی کے باعث پی ایس ایل کا شیڈول مؤخر کیا گیا تھا، جس کے نتیجے میں ایونٹ کا ٹکراؤ انڈین پریمیئر لیگ (آئی پی ایل) سے ہو گیا تھا۔ اس تجربے کے بعد پی سی بی نے فیصلہ کیا ہے کہ آئندہ پی ایس ایل کو ایک مستقل، غیر متصادم ونڈو دی جائے۔
