لاہور، – پاکستان سپر لیگ (پی ایس ایل) میں کرکٹ کے ساتھ ساتھ دلچسپ لمحے بھی شائقین کو خوب محظوظ کر رہے ہیں۔ لاہور قلندرز کے انگلش کرکٹر سیم بلنگز نے اپنے مزاحیہ انداز سے پشاور زلمی کے کپتان اور اسٹار بیٹر بابراعظم کو دوستانہ انداز میں ٹرول کر دیا، جس پر مداحوں کی ہنسی نہ رکی!
سیم بلنگز نے انسٹاگرام اسٹوری پر ایک پوسٹ شیئر کی جس میں پی ایس ایل 2025 کی تیز ترین اور سست ترین ففٹیز کا موازنہ کیا گیا۔ اس فہرست میں بلنگز کا نام سرفہرست تھا جنہوں نے کوئٹہ گلیڈی ایٹرز کے خلاف صرف 19 گیندوں میں دھواں دار نصف سنچری بنائی، جبکہ بابراعظم نے اسلام آباد یونائیٹڈ کے خلاف 47 گیندوں میں یہ سنگ میل عبور کیا۔
بلنگز نے اس مزاحیہ فرق کو اجاگر کرتے ہوئے ہنسی مذاق کا ماحول بنایا، جسے سوشل میڈیا صارفین نے بھرپور انداز میں انجوائے کیا۔ کرکٹ مداحوں نے اس دوستانہ چھیڑ چھاڑ کو کھیل کا حسن قرار دیا۔
بابراعظم اور سیم بلنگز دونوں ہی اپنی اپنی ٹیموں کے اہم کھلاڑی ہیں، اور میدان میں ان کی کارکردگی کا شائقین کو بے صبری سے انتظار ہے۔ پی ایس ایل کے بقیہ میچز 17 مئی سے شروع ہو رہے ہیں جبکہ فائنل 25 مئی کو لاہور کے تاریخی قذافی اسٹیڈیم میں کھیلا جائے گا۔
یاد رہے کہ بھارتی جارحیت کے باعث پی ایس ایل کو کچھ وقت کے لیے ملتوی کیا گیا تھا، تاہم اب ایونٹ دوبارہ جوش و خروش کے ساتھ بحال ہو رہا ہے۔
ایسے خوشگوار اور ہلکے پھلکے لمحے ثابت کرتے ہیں کہ کرکٹ صرف ایک کھیل نہیں بلکہ جذبات، مزاح، اور دوستی کا حسین امتزاج بھی ہے۔
