یو ایس اوپن اسٹیڈیم کی تاریخ ساز تزئین و توسیع: 800 ملین ڈالرز کا منصوبہ
نیویارک: عالمی ٹینس کے سب سے بڑے اسٹیڈیم آرتھر ایش اسٹیڈیم کی جدید طرز پر تزئین و آرائش اور توسیع کا شاندار منصوبہ تیار کر لیا گیا ہے۔ یونائیٹڈ اسٹیٹس ٹینس ایسوسی ایشن (USTA) نے اس تاریخی منصوبے کے لیے 800 ملین ڈالرز کی خطیر رقم مختص کی ہے، جو یو ایس اوپن کی تاریخ کی سب سے بڑی سرمایہ کاری ہے۔
برطانوی میڈیا کے مطابق اس منصوبے کے تحت اسٹیڈیم میں 2 ہزار نئی نشستیں شامل کی جائیں گی، جس سے مجموعی گنجائش 23,771 سے بڑھا کر تقریباً 25,771 کی جائے گی۔ اسٹیڈیم کا نیا داخلی راستہ اور جدید فین سہولتیں بھی تعمیر کی جائیں گی تاکہ شائقین کو بہتر تجربہ فراہم کیا جا سکے۔
منصوبے میں صرف توسیع ہی نہیں بلکہ مکمل فین ایکسپیرینس کو اپ گریڈ کیا جا رہا ہے۔ فلشنگ میڈوز میں انڈور اور آؤٹ ڈور سہولتوں کے ساتھ ایک جدید پلیئر پرفارمنس سینٹر بھی قائم کیا جائے گا، جو کھلاڑیوں کی تربیت اور تیاری کے لیے اہم سنگ میل ثابت ہوگا۔
یو ایس ٹی اے کے سی ای او لیو شیر کے مطابق یہ منصوبہ اگلے 25 برس کی ضروریات کو مدِنظر رکھ کر بنایا گیا ہے، جو ٹینس کے مستقبل کو بہتر بنانے کے عزم کا حصہ ہے۔ اُن کا کہنا تھا:
“یہ صرف اسٹیڈیم کی تزئین نہیں، بلکہ یو ایس اوپن کے عالمی معیار کو اگلے درجے پر لے جانے کی کوشش ہے۔”
منصوبہ مرحلہ وار مکمل کیا جائے گا تاکہ ایونٹس متاثر نہ ہوں، اور توقع ہے کہ 2027ء تک یہ شاندار تعمیراتی منصوبہ مکمل ہو جائے گا۔
واضح رہے کہ آرتھر ایش اسٹیڈیم 1997ء میں قائم کیا گیا تھا، اور 2016ء میں یہاں جدید چھت نصب کی گئی تھی۔ اب ایک بار پھر یہ اسٹیڈیم عالمی ٹینس کی جدید ترین علامت کے طور پر اُبھرنے کو تیار ہے۔
