سڈنی/لندن: انٹرنیشنل کرکٹ کونسل (آئی سی سی) ورلڈ ٹیسٹ چیمپئن شپ 2023-25 کے فائنل کے لیے کرکٹ آسٹریلیا نے 15 رکنی مضبوط اور تجربہ کار اسکواڈ کا اعلان کر دیا ہے، جس کی قیادت فاسٹ باؤلر پیٹ کمنز کریں گے۔ یہ تاریخی مقابلہ 11 سے 15 جون تک لندن کے مشہور لارڈز کرکٹ گراؤنڈ میں آسٹریلیا اور جنوبی افریقہ کے درمیان کھیلا جائے گا۔
اسکواڈ میں اسٹیو اسمتھ، عثمان خواجہ، مارنوس لبوشین، اور نیتھن لیون جیسے تجربہ کار کھلاڑی شامل ہیں، جبکہ نوجوان باصلاحیت کھلاڑیوں کو بھی بھرپور موقع دیا گیا ہے۔ ٹیم میں شامل دیگر کھلاڑیوں میں الیکس کیری، کیمرون گرین، ٹریوس ہیڈ، جوش ہیزل ووڈ، جوش انگلس، سیم کونسٹاس، میٹ کوہنیمن، اسکاٹ بولینڈ، مچل اسٹارک اور بیو ویبسٹر شامل ہیں۔
کرکٹ آسٹریلیا کے مطابق یہی اسکواڈ دورۂ ویسٹ انڈیز کے لیے بھی برقرار رکھا جائے گا، جہاں آسٹریلیا اور ویسٹ انڈیز کے درمیان تین ٹیسٹ میچز کی سیریز کھیلی جائے گی۔ اس سیریز کا پہلا ٹیسٹ 25 جون سے برج ٹاؤن، بارباڈوس میں شروع ہو گا۔
آسٹریلوی بورڈ کا کہنا ہے کہ اسکواڈ میں تجربے اور نوجوان توانائی کا امتزاج ہے جو ٹیم کو نہ صرف ورلڈ ٹیسٹ چیمپئن شپ فائنل میں کامیابی دلانے کی اہلیت رکھتا ہے، بلکہ مستقبل کے چیلنجز کے لیے بھی تیار ہے۔
دوسری جانب شائقین کرکٹ اس بڑے مقابلے کے لیے بےحد پُرجوش ہیں، اور دنیا بھر میں آنکھیں لارڈز پر جمی ہوئی ہیں جہاں ٹیسٹ کرکٹ کا "تاج” اپنے نئے بادشاہ کا منتظر ہے۔
