کراچی / لاہور — سابق ٹیسٹ کرکٹر باسط علی نے پاک بھارت حالیہ کشیدگی کے دوران سابق کپتان وسیم اکرم کی جانب سے تاخیر سے اظہارِ یکجہتی پر شدید تنقید کی ہے۔ باسط علی کا کہنا ہے کہ مشکل وقت میں خاموشی اختیار کرنا اور بعد میں بیان دینا قوم کے ساتھ سچے جذبے کی عکاسی نہیں کرتا۔
یہ تنقید اس وقت سامنے آئی جب وسیم اکرم نے سماجی رابطے کی ویب سائٹ ایکس (ٹوئٹر) پر ایک پوسٹ میں کہا کہ:
"ہم سب اپنی مسلح افواج کے ساتھ کھڑے ہیں، جنہوں نے دشمن کی جارحیت کا بھرپور جواب دیا۔ جنگ تب ہوتی ہے جب زبان ناکام ہوجاتی ہے، اس لیے بات چیت ہی مسائل کا حل ہے۔ پاکستان زندہ باد!”
یہ ٹوئٹ اس وقت کیا گیا جب پاکستان اور بھارت کے درمیان باضابطہ جنگ بندی کا اعلان ہو چکا تھا، جس پر سوشل میڈیا صارفین کی جانب سے بھی وسیم اکرم کو تاخیر سے ردعمل دینے پر تنقید کا سامنا کرنا پڑا۔
باسط علی نے برملا کہا:
"ایسے حساس موقع پر جب پوری قوم افواجِ پاکستان کے ساتھ کھڑی تھی، کچھ اہم شخصیات کی خاموشی افسوسناک رہی۔ کرکٹرز صرف کھیل کے میدان تک محدود نہیں ہوتے، وہ عوام کی آواز بھی ہوتے ہیں، اور انہیں بروقت موقف دینا چاہیے۔”
جنگ بندی کے بعد کرکٹ سرگرمیاں بحال؟
دوسری جانب جنگ بندی کے بعد پاکستان سپر لیگ (PSL) کے 10ویں ایڈیشن کی بحالی کی امیدیں روشن ہو گئی ہیں۔ ذرائع کے مطابق، غیر ملکی کھلاڑیوں کو دبئی میں قیام کی ہدایت دی گئی ہے، جب کہ لیگ کے باقی 8 میچز راولپنڈی میں کرانے پر غور جاری ہے۔
کرکٹ شائقین کو امید ہے کہ حالات کی بہتری کے ساتھ ساتھ نہ صرف PSL مکمل ہوگا بلکہ کھلاڑیوں کے درمیان ہم آہنگی اور یکجہتی بھی نظر آئے گی۔
