نیٹ فلیکس کی چائلڈ اسٹار میلینا برانڈاؤ 11 سال کی عمر میں پُراسرار بیماری کے باعث انتقال کر گئیں
برازیل — برازیل کی کم عمر اور باصلاحیت اداکارہ میلینا برانڈاؤ، جو نیٹ فلیکس کی مشہور سیریز "Sintonia” میں اپنی شاندار اداکاری کے لیے جانی جاتی تھیں، 11 سال کی عمر میں ایک پُراسرار اور جان لیوا بیماری کے باعث انتقال کر گئیں۔ ان کی اچانک موت نے نہ صرف برازیل بلکہ دنیا بھر میں مداحوں کو غمزدہ کر دیا۔
24 اپریل کو میلینا نے سر درد، ٹانگوں میں درد، تھکن اور بھوک کی کمی کی شکایت کی۔ ان کی والدہ کے مطابق، ڈاکٹروں نے ابتدائی طور پر ڈینگی کا شبہ ظاہر کیا لیکن اس کا میڈیکل ٹیسٹ نہیں کیا گیا اور صرف دوا دے کر انہیں گھر واپس بھیج دیا گیا۔ تاہم، دو دن بعد 26 اپریل کو ان کی حالت مزید بگڑ گئی اور وہ چلنے کے قابل نہ رہیں، جس کے بعد دوبارہ اسپتال لے جایا گیا، لیکن انہیں واپس بھیج دیا گیا۔
28 اپریل کو میلینا باتھ روم میں بے ہوش ہو گئیں اور انہیں فوری طور پر اسپتال منتقل کیا گیا، جہاں اگلے دن ان کا پہلا کارڈیک اریسٹ ہوا۔ سی ٹی اسکین کے نتائج کے مطابق ان کے دماغ میں 5 سینٹی میٹر کا ماس تھا، لیکن اسپتال میں نیورولوجسٹ کی کمی کے باعث یہ طے نہ ہو سکا کہ یہ رسولی، سِسٹ یا خون کا لوتھڑا تھا۔ اسپتال میں رہتے ہوئے میلینا کی 13 بار دل کی دھڑکن رک گئی اور انہیں کئی بار سانس کی تکلیف کا سامنا بھی کرنا پڑا۔
بالآخر ڈاکٹروں نے میلینا کو دماغی طور پر مردہ قرار دے دیا اور لائف سپورٹ مشین ہٹا دی۔ میلینا کی بیماری کی مکمل تشخیص نہ ہو سکی اور ان کی موت نے لاکھوں دلوں کو غمزدہ کر دیا۔ ان کے مداح سوشل میڈیا پر دعاؤں اور محبت بھرے پیغامات کے ذریعے ان سے اپنی عقیدت کا اظہار کر رہے ہیں۔
میلینا برانڈاؤ کی اداکاری اور شخصیت نے دنیا بھر کے مداحوں کے دلوں میں ایک خاص جگہ بنائی تھی اور ان کی موت نے ایک ایسے ستارے کو ہم سے چھین لیا جو ابھی بہت کچھ حاصل کرنے والا تھا۔ ان کا یادگار سفر ان کے مداحوں کے دلوں میں ہمیشہ زندہ رہے گا۔
