لاہور: پاکستان کرکٹ بورڈ (پی سی بی) نے پاکستان سپر لیگ (پی ایس ایل) سیزن 10 کے دوران بچوں میں کینسر سے آگاہی پیدا کرنے کے لیے ایک خصوصی دن منایا، جس کا مقصد بیماری سے لڑنے والے بچوں کو حوصلہ دینا اور اس اہم مسئلے پر عوامی توجہ مبذول کرانا تھا۔
قذافی اسٹیڈیم لاہور میں کوئٹہ گلیڈی ایٹرز اور اسلام آباد یونائیٹڈ کے درمیان ہونے والے میچ کے دوران تین کینسر میں مبتلا بچوں کو اعزازی مہمان کے طور پر مدعو کیا گیا۔ ان بچوں نے دونوں ٹیموں کے کپتانوں، سعود شکیل اور شاداب خان کے ساتھ میدان میں کرکٹ کھیل کر لمحے یادگار بنا دیے۔
اس جذباتی لمحے میں کھلاڑیوں نے نہ صرف بچوں کے ساتھ تصاویر بنوائیں بلکہ انہیں اپنی دستخط شدہ شرٹس بھی تحفے میں دیں، جس سے بچوں کے چہروں پر خوشی اور حوصلے کی روشنی نظر آئی۔
پی سی بی کی یہ کاوش سوشل ذمہ داری کی ایک خوبصورت مثال بنی، جہاں کھیل کے میدان کو صرف مقابلے کا نہیں بلکہ پیغام رسانی اور انسانیت نوازی کا ذریعہ بھی بنایا گیا۔
