لاہور (اسپورٹس رپورٹر) — پاکستان کرکٹ بورڈ (پی سی بی) نے بنگلادیش کے خلاف آئندہ ٹی20 انٹرنیشنل سیریز کا باضابطہ شیڈول جاری کر دیا ہے۔ دونوں ٹیمیں پانچ ٹی20 میچز پر مشتمل ایک سنسنی خیز سیریز میں مدمقابل ہوں گی، جو 25 مئی سے 3 جون تک جاری رہے گی۔
ابتدائی دو میچز 25 اور 27 مئی کو فیصل آباد کے تاریخی اقبال اسٹیڈیم میں ہوں گے، جبکہ بقیہ تین میچز 30 مئی، یکم جون اور 3 جون کو لاہور کے قذافی اسٹیڈیم میں کھیلے جائیں گے۔ تمام میچز مقامی وقت کے مطابق رات 8 بجے شروع ہوں گے۔
یہ فیصلہ آئی سی سی مینز ٹی20 ورلڈکپ کی تیاریوں کے پیشِ نظر کیا گیا ہے۔ ابتدائی منصوبے کے مطابق سیریز میں 3 ون ڈے اور 3 ٹی20 میچز شامل تھے، لیکن باہمی اتفاق کے تحت ون ڈے میچز کو ختم کر کے 2 اضافی ٹی20 میچز شامل کیے گئے ہیں تاکہ کھلاڑی عالمی ایونٹ کے لیے بھرپور تیاری کر سکیں۔
فیصل آباد 17 سال بعد انٹرنیشنل کرکٹ کی میزبانی کرنے جا رہا ہے۔ اس سے قبل 2008 میں پاکستان اور بنگلادیش کے درمیان ہی آخری ون ڈے انٹرنیشنل اس میدان میں کھیلا گیا تھا۔
1978 سے 2008 کے دوران اس تاریخی اسٹیڈیم میں 24 ٹیسٹ اور 16 ون ڈے میچز کھیلے جا چکے ہیں۔ حالیہ برسوں میں اقبال اسٹیڈیم نے چیمپئنز ون ڈے کپ اور نیشنل ٹی20 کپ کی کامیاب میزبانی کر کے اپنی اہمیت دوبارہ منوائی ہے۔
یہ سیریز نہ صرف شائقین کرکٹ کے لیے دلچسپی کا باعث ہو گی بلکہ فیصل آباد کے کرکٹ شائقین کے لیے یادگار لمحہ بھی ثابت ہو گی، جو ایک طویل عرصے بعد عالمی کرکٹ ایکشن کو اپنے شہر میں دیکھنے کا موقع پا رہے ہیں۔
