اسلام آباد: امریکہ میں غیر قانونی اسلحہ رکھنے اور ممکنہ حملے کی منصوبہ بندی کے الزام میں ایک پاکستانی نژاد امریکی شہری کی گرفتاری کے حوالے سے پاکستان کے دفتر خارجہ نے وضاحت جاری کی ہے۔
دفتر خارجہ کے ترجمان طاہر اندرابی نے بتایا کہ امریکہ میں گرفتار ہونے والا لقمان خان پاکستانی شہری نہیں بلکہ افغان شہری ہے۔ انہوں نے کہا کہ لقمان خان بطور مہاجر کچھ عرصہ پاکستان میں رہا، تاہم اس کی بیشتر زندگی امریکہ میں گزری ہے۔
ترجمان کے مطابق امریکی میڈیا میں پاکستانی شہری کی گرفتاری سے متعلق خبریں بے بنیاد ہیں۔ لقمان خان کے پاس امریکہ اور افغانستان کی دہری شہریت ہے اور اس نے کچھ وقت افغان پناہ گزین کیمپ میں بھی گزارا۔
واضح رہے کہ امریکی شہر ڈیلاویئر میں 25 سالہ لقمان خان کو غیر قانونی اسلحہ رکھنے اور حملے کی منصوبہ بندی کے الزام میں گرفتار کیا گیا۔ امریکی میڈیا کے مطابق اس کی گرفتاری 24 نومبر کی رات عمل میں آئی جب پولیس نے کینبی پارک ویسٹ میں ایک ٹرک کو روکا جس میں لقمان موجود تھا۔
پولیس کے مطابق ملزم نے گاڑی سے باہر نکلنے کے احکامات پر عمل نہیں کیا اور مزاحمت کی، جس کے بعد اسے حراست میں لیا گیا۔ تفتیش کے دوران ٹرک سے پستول، میگزین اور مبینہ حملے کی منصوبہ بندی کی دستاویزات برآمد ہوئیں، جن میں یونیورسٹی آف ڈیلاویئر کے پولیس اسٹیشن کا خاکہ، داخلی و خارجی دروازوں کے نشانات اور ایک پولیس افسر کا نام شامل تھا۔
