واشنگٹن: امریکی حکومت نے سفری پابندیوں کی فہرست کو بڑھا کر 30 ممالک تک پہنچانے کا فیصلہ کرلیا ہے۔
امریکی سیکرٹری داخلہ کے مطابق صدر ڈونلڈ ٹرمپ اس بات کا جائزہ لے رہے ہیں کہ مزید کن ممالک پر پابندیاں عائد کی جائیں۔ پہلے واشنگٹن حملے کے بعد 19 ممالک کے باشندوں پر سفری پابندی عائد کی گئی تھی۔
ٹرمپ انتظامیہ نے قومی سلامتی اور عوامی تحفظ کے خدشات کی بنیاد پر 19 غیر یورپی ممالک سے آنے والے تارکین وطن کی تمام امیگریشن درخواستیں روک دی تھیں، جن میں گرین کارڈ اور امریکی شہریت کی کارروائیاں بھی شامل تھیں۔
جون میں ان 19 ممالک پر پہلے ہی جزوی پابندیاں نافذ تھیں، تاہم نئی پابندیوں کے تحت اب افغانستان، برما، چاڈ، جمہوریہ کانگو، استوائی گنی، اریٹریا، ہیٹی، ایران، لیبیا، صومالیہ، سوڈان اور یمن پر مکمل پابندی عائد کر دی گئی ہے۔
اسی طرح دیگر ممالک جنہیں جون میں جزوی پابندیوں کا سامنا تھا، ان میں برونڈی، کیوبا، لاؤس، سیرالیون، ٹوگو، ترکمانستان اور وینیزویلا شامل ہیں۔
امریکی حکام کے مطابق صورتحال کا جائزہ جاری ہے اور مستقبل میں فہرست میں مزید ممالک شامل کیے جانے کا امکان موجود ہے۔
