دسمبر 2025: فلکیات کے شوقین افراد کے لیے دلچسپ آسمانی مناظر کا مہینہ
اسلام آباد: دسمبر 2025 فلکیات کے شوقین افراد کے لیے دلچسپ اور غیر معمولی آسمانی سرگرمیوں سے بھرپور مہینہ ثابت ہوگا۔ ماہرین فلکیات کے مطابق اس دوران بین النّظامی دم دار ستارہ 3I/ATLAS زمین کے قریب ترین فاصلے سے گزرے گا، سالانہ جمنائیڈ میٹیئر شاور اپنے عروج پر ہوگا، جبکہ چاند اور مشتری کا نایاب اقتران بھی آسمان کو دلکش بنا دے گا۔
ماہرین کے مطابق دم دار ستارہ 3I/ATLAS 19 دسمبر کو زمین سے تقریباً 274 ملین کلومیٹر کی دوری پر ہوگا۔ اگرچہ یہ فاصلہ بہت زیادہ ہے، لیکن سائنسی لحاظ سے دم دار ستارہ کا قریب آنا انتہائی اہم تصور کیا جا رہا ہے۔ یہ ستارہ زمین کے لیے کسی خطرے کا باعث نہیں، اور 30 سینٹی میٹر یا اس سے بڑے ٹیلی اسکوپ کے ذریعے اس کا مشاہدہ ممکن ہے۔ ماہرین کے مطابق یہ جسم ہمارے نظامِ شمسی کا حصہ نہیں بلکہ سورج کے نظام سے باہر سے آنے والا ایک بین النّظامی جسم ہے۔
7 دسمبر کو چاند اور مشتری کا نایاب ملاپ دیکھا جا سکے گا، جس میں دونوں آسمانی اجسام بظاہر ایک دوسرے کے بہت قریب نظر آئیں گے۔ آسمان صاف ہونے کی صورت میں یہ مناظر بغیر دوربین کے بھی آنکھوں سے دیکھا جا سکتا ہے۔
اسی طرح، 13 اور 14 دسمبر کی رات کو سالانہ جمنائیڈ میٹیئر شاور اپنی پوری شدت کے ساتھ نمودار ہوگا، جس میں ایک گھنٹے میں تقریباً 120 ٹوٹتے تارے دکھائی دے سکتے ہیں۔ ماہرین نے شہری روشنیوں سے دور، تاریک مقامات کو بہترین مشاہدے کے لیے موزوں قرار دیا ہے۔
فلکیات کے شوقین افراد کو مشورہ دیا گیا ہے کہ مشاہدے کے دوران گرم لباس پہنیں، کم شدت والی روشنی استعمال کریں اور مناسب مقام کا انتخاب کریں تاکہ یہ تجربہ مزید یادگار بن سکے۔
