وائٹ ہاؤس نے ڈونلڈ ٹرمپ کو ’دی پیس پریذیڈنٹ‘ قرار دے دیا

واشنگٹن – امریکی صدر ڈونلڈ ٹرمپ کو وائٹ ہاؤس کی جانب سے "دی پیس پریذیڈنٹ” (امن کا صدر) کا لقب دے دیا گیا ہے۔ یہ لقب ایک سوشل میڈیا پوسٹ کے ذریعے سامنے آیا ہے جس میں صدر ٹرمپ کی تصویر کے ساتھ یہ الفاظ نمایاں طور پر درج ہیں۔

سماجی رابطے کی ویب سائٹ ایکس (سابقہ ٹوئٹر) پر وائٹ ہاؤس کے آفیشل اکاؤنٹ سے جاری کردہ پوسٹ میں صدر ٹرمپ کو ایک امن کے علمبردار رہنما کے طور پر پیش کیا گیا ہے، جس کے فوراً بعد سیاسی اور عوامی حلقوں میں مختلف ردعمل سامنے آئے ہیں۔

صدر ٹرمپ اس سے قبل کئی مواقع پر دعویٰ کر چکے ہیں کہ انہوں نے دنیا بھر میں 7 جنگیں رکوانے میں کردار ادا کیا ہے، اور وہ خود کو عالمی امن کے لیے ایک مضبوط آواز سمجھتے ہیں۔

ان دعوؤں کی بنیاد پر وہ نوبیل انعام برائے امن کے لیے بھی امیدوار بننے کی خواہش رکھتے ہیں، تاہم بین الاقوامی تجزیہ کاروں کا ماننا ہے کہ ان کے جیتنے کے امکانات فی الحال کم ہیں، خاص طور پر ان کی پالیسیوں، بین الاقوامی تنازعات سے متعلق رویے اور داخلی سیاسی بیانات کے باعث۔

اس حالیہ پوسٹ کو وائٹ ہاؤس کی جانب سے ٹرمپ کی امن پسندی پر زور دینے کی ایک علامتی کوشش قرار دیا جا رہا ہے، جو ممکنہ طور پر آنے والے صدارتی انتخابات کے پیش نظر سیاسی حکمت عملی کا بھی حصہ ہو سکتی ہے۔