ملتان: 6 مئی 2025
پاکستان سپر لیگ (پی ایس ایل) میں پشاور زلمی کے آل راؤنڈر احمد دانیال نے کہا ہے کہ ٹیم بھرپور محنت کے ساتھ میدان میں اتری ہے اور باقی دونوں میچ جیتنے کے لیے پرعزم ہے۔ ملتان میں میچ کے بعد پریس کانفرنس کرتے ہوئے احمد دانیال کا کہنا تھا کہ ٹیم میں ایک مثبت ماحول ہے اور تمام کھلاڑی ایک دوسرے کو مکمل بیک اپ فراہم کر رہے ہیں۔
انہوں نے کہا،
"مجھے بیٹنگ کا شوق ہے، اس پر خصوصی توجہ دے رہا ہوں۔ ٹیم کے لیے ہر شعبے میں بہتری لانا میرا ہدف ہے۔”
زلمی آل راؤنڈر نے تسلیم کیا کہ ملتان سلطانز ایک مضبوط ٹیم ہے لیکن پشاور زلمی کی پلاننگ اور سوچ بھی واضح اور پرعزم ہے۔
"ہماری حکمت عملی مضبوط ہے، ان شاء اللہ جیتنے کی پوری کوشش کریں گے۔”
بابر اعظم کی قیادت پر بات کرتے ہوئے احمد دانیال نے کہا:
"یہ میری پہلی بار ہے کہ بابر اعظم کی کپتانی میں کھیل رہا ہوں، وہ نہایت مثبت انداز میں رہنمائی کرتے ہیں اور کھلاڑیوں کو اعتماد دیتے ہیں۔”
انہوں نے مزید کہا کہ بابر اعظم ٹیم کے لیے سوچتے ہیں اور ہر فیصلہ ٹیم کے مفاد کو سامنے رکھ کر کرتے ہیں۔
پشاور زلمی کے نوجوان آل راؤنڈر کی یہ گفتگو نہ صرف ٹیم کے اتحاد اور عزم کی عکاسی کرتی ہے بلکہ شائقینِ کرکٹ کے لیے ایک امید کی کرن بھی ہے کہ زلمی آنے والے میچز میں ایک بھرپور کم بیک کرے گی۔
