اسٹاک مارکیٹ میں استحکام برقرار ، ڈالر کی قیمت میں بڑی کمی
پاکستان اسٹاک ایکسچینج میں تیزی کا رجحان برقرار ہے جبکہ امریکی ڈالر کے مقابلے میں پاکستانی روپے کی قدر میں بھی بہتری دیکھنے میں آ رہی ہے۔ کاروباری ہفتے کے تیسرے روز مارکیٹ کے آغاز پر سرمایہ کاروں کا اعتماد بحال نظر آیا اور اسٹاک ایکسچینج میں مثبت پیش رفت ریکارڈ کی گئی۔
کاروبار کے آغاز پر 100 انڈیکس 252 پوائنٹس کے اضافے کے ساتھ بڑھ کر ایک لاکھ 70 ہزار 699 پوائنٹس کی سطح پر پہنچ گیا۔ گزشتہ روز انڈیکس نے دورانِ کاروبار بلند ترین سطح کو چھوا تھا تاہم اختتام پر منفی زون میں بند ہوا تھا، جبکہ آج ایک بار پھر مارکیٹ میں تیزی دیکھی گئی۔
دوسری جانب انٹر بینک میں امریکی ڈالر کی قیمت میں معمولی کمی ریکارڈ کی گئی ہے۔ ایکسچینج کمپنیز ایسوسی ایشن کے مطابق ڈالر کی قدر میں 5 پیسے کمی کے بعد انٹر بینک میں ڈالر 280 روپے 25 پیسے پر ٹریڈ کر رہا ہے۔ روپے کی قدر میں بہتری کو معاشی استحکام کی جانب مثبت اشارہ قرار دیا جا رہا ہے۔
