آئندہ 24 گھنٹوں کےد وران موسم کیسا رہے گا؟ محکمہ موسمیات نے پیشگوئی کردی
محکمہ موسمیات نے ملک کے مختلف شہروں میں موسم سرد اور خشک رہنے کی پیشگوئی کر دی ہے۔ محکمہ موسمیات کے مطابق آج کم سے کم درجہ حرارت 12 سے 14 ڈگری سینٹی گریڈ کے درمیان ریکارڈ کیا گیا، جبکہ دن کے اوقات میں موسم خشک اور رات و صبح کے وقت سرد رہنے کا امکان ہے۔ صبح کے وقت کم سے کم درجہ حرارت 15 ڈگری سینٹی گریڈ ریکارڈ کیا گیا۔
کراچی میں اس وقت درجہ حرارت 18 ڈگری سینٹی گریڈ ہے، جبکہ زیادہ سے زیادہ درجہ حرارت 27 ڈگری سینٹی گریڈ تک جانے کا امکان ظاہر کیا گیا ہے۔ شمال مشرقی سمت سے خشک ہوائیں 14 کلومیٹر فی گھنٹہ کی رفتار سے چل رہی ہیں اور ہوا میں نمی کا تناسب 44 فیصد ریکارڈ کیا جا رہا ہے۔
محکمہ موسمیات کے مطابق شہر قائد کا فضائی معیار آج بھی مضرِ صحت قرار دیا گیا ہے۔ دنیا کے آلودہ ترین شہروں کی فہرست میں کراچی دسویں نمبر پر ہے، جبکہ کورنگی صنعتی ایریا کو شہر کا سب سے زیادہ آلودہ علاقہ قرار دیا گیا ہے۔
ادھر خیبرپختونخوا کے بیشتر اضلاع میں موسم سرد اور جزوی طور پر ابر آلود رہنے کا امکان ہے، جبکہ صوبے کے چند بالائی اضلاع میں شدید سردی کی پیشگوئی کی گئی ہے۔ محکمہ موسمیات کا کہنا ہے کہ صوبے کے میدانی علاقوں پشاور، صوابی، مردان، چارسدہ اور ڈیرہ اسماعیل خان میں دھند چھائی رہنے کا امکان ہے۔ گزشتہ 24 گھنٹوں کے دوران چترال میں ہلکی بارش ریکارڈ کی گئی۔
پشاور میں کم سے کم درجہ حرارت 7 اور زیادہ سے زیادہ 26 ڈگری سینٹی گریڈ ریکارڈ کیا گیا، جبکہ ہوا میں نمی کا تناسب 48 فیصد رہا۔ پاراچنار میں درجہ حرارت ایک، دیر میں دو، چترال، دروش، کاکول اور کالام میں تین تین ڈگری سینٹی گریڈ ریکارڈ کیا گیا۔
بالاکوٹ، تیمرگرہ اور میرکھنی میں چار، سیدو شریف اور مالم جبہ میں پانچ، تخت بائی اور چراٹ میں چھ، ڈی آئی خان میں نو جبکہ بنوں میں کم سے کم درجہ حرارت 11 ڈگری سینٹی گریڈ ریکارڈ کیا گیا۔
