لندن: انگلینڈ میں این ایچ ایس کے ریزیڈنٹ ڈاکٹروں کی پانچ روزہ ہڑتال شروع ہو گئی ہے، جس کے باعث مریضوں کو غیر ہنگامی علاج میں مشکلات کا سامنا ہے۔
برطانوی میڈیا کے مطابق یہ ہڑتال این ایچ ایس میں ڈاکٹروں کی 14ویں ہڑتال ہے۔ ملک میں فلو کی شدید لہر کے دوران اسپتالوں پر دباؤ بڑھ گیا ہے، اور ہڑتال کے باعث مریضوں کو علاج کی سہولتیں محدود ہو گئی ہیں۔
وزیر صحت نے ہڑتال پر ردعمل دیتے ہوئے الزام لگایا کہ اس کا مقصد این ایچ ایس کو زیادہ نقصان پہنچانا ہے۔ دوسری جانب برٹش میڈیکل ایسوسی ایشن نے کہا ہے کہ مریضوں کی حفاظت اولین ترجیح ہے اور ہڑتال کے دوران خدمات جاری رکھنے کے لیے سینئر ڈاکٹرز تعینات کیے گئے ہیں۔
برطانوی میڈیا کے مطابق جی پی کلینکس کھلی رہیں گی اور ایمرجنسی سروسز دستیاب ہوں گی، تاہم کچھ اسپتالوں کے ایمرجنسی ڈپارٹمنٹس عارضی طور پر بند ہیں۔ عوام کو ہدایت کی گئی ہے کہ فوری مگر غیر جان لیوا مسائل کے لیے 111 آن لائن سروس استعمال کریں۔
واضح رہے کہ برطانوی حکومت کی نئی پیشکش کے باوجود ڈاکٹروں کی ہڑتال برقرار ہے۔
