اسلام آباد: قومی اسمبلی کی قائمہ کمیٹی برائے اوورسیز پاکستانیز اور انسانی حقوق کے اجلاس میں انکشاف ہوا کہ دنیا کے مختلف ممالک نے بھیک مانگنے یا غیر قانونی طور پر جانے والے پاکستانیوں کو ڈی پورٹ کیا ہے۔ اجلاس کی صدارت چیئرمین کمیٹی آغا رفیع اللہ نے کی۔
ڈی جی ایف آئی اے نے کمیٹی کو بتایا کہ اس سال مجموعی طور پر 51 ہزار پاکستانی مختلف ممالک سے آف لوڈ یا ڈی پورٹ کیے گئے۔ سب سے زیادہ 24 ہزار افراد سعودی عرب نے، 6 ہزار افراد یو اے ای نے، اور 2,500 افراد آزربائیجان سے ڈی پورٹ کیے۔
ڈی جی ایف آئی اے نے بتایا کہ عمرے کے نام پر یورپ جانے کی کوشش کرنے والے افراد کو بھی ثبوت کے ساتھ آف لوڈ کیا گیا۔ اس کے علاوہ، کمبوڈیا جانے والے 24 ہزار افراد میں سے 12 ہزار تاحال واپس نہیں آئے، جبکہ برما میں سیاحتی ویزے پر گئے 4 ہزار افراد میں سے 2,500 واپس نہیں آئے۔
انہوں نے کہا کہ غیر قانونی افراد کو روکنے کے اقدامات سے پاکستان کی پاسپورٹ رینکنگ 118 سے بڑھ کر 92 ہو گئی ہے، اور پاکستان اب غیر قانونی بیرون ملک جانے والے ٹاپ 5 ممالک میں شامل نہیں رہا۔ گزشتہ برس 8 ہزار افراد غیر قانونی طور پر یورپ گئے، جبکہ اس سال یہ تعداد 4 ہزار رہی۔
ڈی جی ایف آئی اے نے مزید بتایا کہ دبئی اور جرمنی نے پاکستانی سرکاری پاسپورٹ پر ویزا فری سہولت دی ہے، اور ایمی ایپلیکیشن جنوری کے وسط میں لانچ کی جائے گی، جس کے ذریعے بیرون ملک روانگی سے 24 گھنٹے قبل امیگریشن کی جانچ کی جائے گی۔
مزید برآں، انہوں نے بتایا کہ زمبابوے کے سفیر کے مطابق ایتھوپیا اور زیمبیا سے لوگ غیر قانونی طور پر یورپ جا رہے ہیں، اور ایک جعلی فٹبال کلب نے ٹیم کے ساتھ جاپان بھیجا، جس میں ایک لنگڑا شخص بھی شامل تھا۔
