بیرسٹر سیف کی عمران کی ہدایت پر پی ٹی آئی اور اسٹیبلشمنٹ میں صلح کی کوششیں

پی ٹی آئی رہنما بیرسٹر محمد علی سیف کا پیغام: مفاہمت کے ذریعے بحران حل کرنے پر زور

اسلام آباد: پی ٹی آئی کے سینئر رہنما بیرسٹر محمد علی سیف نے کہا ہے کہ عمران خان کی جانب سے دی گئی آخری ہدایت کے مطابق وہ پی ٹی آئی اور اسٹیبلشمنٹ کے درمیان رابطوں میں سہولت کاری کر رہے ہیں۔

دی نیوز سے گفتگو میں بیرسٹر سیف نے بتایا کہ وہ عمران خان اور بشریٰ بی بی کی رہائی کے خواہاں ہیں اور اس مقصد کے لیے جو بھی ممکن کردار ادا کیا جا سکتا ہے، وہ کرنے کو تیار ہیں۔ انہوں نے واضح کیا کہ ان کے اسٹیبلشمنٹ کے ساتھ روابط کئی دہائیوں پر محیط ہیں اور وہ صرف ان روابط کو پارٹی اور قائد کی مدد کے لیے استعمال کر رہے ہیں۔

بیرسٹر سیف نے بتایا کہ عمران خان سے ان کی آخری ملاقات گزشتہ سال 4 نومبر کو اڈیالہ جیل میں ہوئی تھی۔ وہ پارٹی رہنماؤں میں ان افراد میں شامل ہیں جو محاذ آرائی کے بجائے مفاہمت اور مذاکرات کو ترجیح دیتے ہیں۔

انہوں نے اپنے سوشل میڈیا اکاؤنٹ پر بھی کہا تھا کہ:
"پی ٹی آئی اور دفاعی اداروں کے درمیان تلخی کسی صورت ملک و قوم کے مفاد میں نہیں۔ کشیدگی کم کرنے کیلئے تحمل اور ذمہ داری کا مظاہرہ کرنا ضروری ہے۔ مسائل کا پائیدار حل مذاکرات کے ذریعے تلاش کیا جائے۔ باہمی دشمنی اور تنقید صرف صورتحال کو پیچیدہ کرتی ہے اور پاکستان کو نقصان پہنچاتی ہے۔”

بیرسٹر سیف نے زور دیا کہ موجودہ سنگین معاشی و سیاسی چیلنجز کے دوران ملک کو اتحاد، اتفاق رائے اور یکجہتی کی ضرورت ہے، اور بامعنی مذاکرات، صبر اور سیاسی دانشمندی کے ذریعے ہی تمام تنازعات کا حل ممکن ہے۔

ان کا کہنا تھا کہ پی ٹی آئی اور ریاستی اداروں کے اہلکاروں کو اشتعال انگیز اور بے بنیاد بیانات سے گریز کرنا چاہیے تاکہ ملک و عوام کو نقصان سے بچایا جا سکے۔