قومی اسمبلی میں اپوزیشن لیڈر کے تقرر پر پی ٹی آئی اور اسپیکر کی اہم ملاقات
اسلام آباد: قومی اسمبلی میں اپوزیشن لیڈر کے تقرر کے معاملے پر پاکستان تحریک انصاف کے چیف وہپ عامر ڈوگر اور اسپیکر قومی اسمبلی سردار ایاز صادق کے درمیان اہم ملاقات ہوئی، جس میں اپوزیشن لیڈر کی تقرری کے طریقہ کار اور قانونی پہلوؤں پر تفصیلی تبادلہ خیال کیا گیا۔
ملاقات کے دوران پی ٹی آئی چیف وہپ عامر ڈوگر نے عمر ایوب کی جانب سے پشاور ہائی کورٹ میں دائر درخواست کے خارج ہونے کی مصدقہ کاپی اسپیکر قومی اسمبلی کو فراہم کی۔ انہوں نے اسپیکر سے اپوزیشن لیڈر کی تقرری کے عمل کو جلد مکمل کرنے کی درخواست بھی کی۔
عامر ڈوگر نے مؤقف اختیار کیا کہ پاکستان تحریک انصاف اپوزیشن لیڈر کی نشست سے متعلق دائر تمام قانونی کیسز واپس لے چکی ہے۔ ان کا کہنا تھا کہ قانونی معاملات نمٹنے کے بعد اب اپوزیشن لیڈر کی تقرری میں کوئی رکاوٹ باقی نہیں رہی۔
اس موقع پر یہ بھی واضح کیا گیا کہ اسپیکر قومی اسمبلی سردار ایاز صادق اس معاملے پر پہلے ہی پاکستان تحریک انصاف کو چار خطوط ارسال کر چکے ہیں، جن میں اپوزیشن لیڈر کی تقرری سے متعلق وضاحت طلب کی گئی تھی۔
ذرائع کے مطابق ملاقات کو خوشگوار اور مثبت پیش رفت قرار دیا جا رہا ہے، جبکہ امکان ظاہر کیا جا رہا ہے کہ قومی اسمبلی میں اپوزیشن لیڈر کی تقرری کا معاملہ جلد حتمی مرحلے میں داخل ہو سکتا ہے۔
