آج دبئی میں پاکستان اور بھارت کی انڈر 19 کرکٹ ٹیموں کے درمیان ایشیا کپ کا فائنل کھیلا جا رہا ہے، اور اس میچ کے اختتام پر ایک اہم سوال پیدا ہو رہا ہے: کیا بھارتی کرکٹ بورڈ پونے 3 ماہ بعد اپنی حکومتی پالیسی پر یوٹرن لیتے ہوئے پاکستان کے وزیر داخلہ محسن نقوی سے انڈر 19 ایشیا کپ کی ٹرافی وصول کرے گا؟
پاکستان کرکٹ بورڈ کے چیئرمین محسن نقوی، جو اس وقت ایشین کرکٹ کونسل کے چیئرمین بھی ہیں، ایک بار پھر فائنل کے دوران مہمان خصوصی ہوں گے اور فاتح ٹیم کو ٹرافی دیں گے۔ اگر بھارت فائنل جیت جاتا ہے تو بھارتی کپتان کو محسن نقوی سے ٹرافی وصول کرنا ہوگی، تاہم ابھی تک اے سی سی اور بھارتی کرکٹ بورڈ اس حوالے سے خاموش ہیں۔
یاد رہے کہ 28 ستمبر کو دبئی میں پاکستان اور بھارت کے درمیان ایشیا کپ کا فائنل کھیلا گیا تھا، جسے بھارت نے پانچ وکٹوں سے جیتا تھا۔ لیکن بھارتی کرکٹ ٹیم نے احتجاجاً محسن نقوی سے ٹرافی وصول کرنے سے انکار کر دیا تھا، جس کے بعد تقریب تقسیم انعامات میں شرکت سے بھی انکار کر دیا۔ اس کے بعد محسن نقوی نے ٹرافی ایشین کرکٹ کونسل کے ہیڈ کوارٹر بھیج دی تھی، جسے آج تک بھارتی ٹیم کے حوالے نہیں کیا جا سکا۔
اب یہ سوال اٹھ رہا ہے کہ کیا بھارتی بورڈ اس مرتبہ اپنی پالیسی میں تبدیلی کرے گا اور ٹرافی وصول کرنے کے لیے محسن نقوی سے ملاقات کرے گا؟ اس معاملے پر دونوں فریقین کی جانب سے کوئی واضح بیان سامنے نہیں آیا۔
