صارفین کے لیے خوش خبری؛ بجلی کی فی یونٹ قیمت میں کمی کا امکان

ملک بھر کے بجلی صارفین کے لیے خوش آئند خبر سامنے آ گئی ہے، کیونکہ بجلی کی قیمت میں کمی کا امکان ظاہر کیا جا رہا ہے۔ سینٹرل پاور پرچیزنگ ایجنسی (سی پی پی اے) نے نومبر کی ماہانہ فیول ایڈجسٹمنٹ کے تحت بجلی کی قیمت میں 72 پیسے فی یونٹ کمی کی درخواست نیشنل الیکٹرک ریگولیٹری اتھارٹی (نیپرا) میں جمع کرا دی ہے۔
اس درخواست پر نیپرا 31 دسمبر کو سماعت کرے گی۔ درخواست کے مطابق نومبر کے مہینے میں ڈسکوز کو مجموعی طور پر 7 ارب 81 کروڑ 30 لاکھ یونٹس بجلی فراہم کی گئی، جبکہ اس دوران بجلی کی فی یونٹ لاگت 6 روپے 16 پیسے رہی۔
نیپرا میں جمع کرائی گئی دستاویزات کے مطابق نومبر میں بجلی کی پیداوار مختلف ذرائع سے کی گئی، جن میں 39.16 فیصد پانی، 9.34 فیصد مقامی کوئلہ، 5.06 فیصد درآمدی کوئلہ، 8.44 فیصد گیس، 8.64 فیصد درآمدی ایل این جی اور 25.23 فیصد جوہری ایندھن شامل ہے۔
اگر نیپرا کی جانب سے یہ درخواست منظور کر لی جاتی ہے تو بجلی صارفین کو 72 پیسے فی یونٹ سستی بجلی ملنے کا امکان ہے۔