سڈنی دہشتگرد حملہ: صدر آصف علی زرداری اور وزیراعظم شہباز شریف کی شدید مذمت، آسٹریلیا سے یکجہتی کا اظہار

اسلام آباد: صدرِ مملکت آصف علی زرداری اور وزیراعظم شہباز شریف نے آسٹریلیا کے شہر سڈنی میں دہشتگرد حملے کی شدید مذمت کرتے ہوئے آسٹریلوی حکومت اور عوام کے ساتھ مکمل یکجہتی کا اظہار کیا ہے۔
صدر آصف علی زرداری نے سڈنی میں ہونے والے دہشتگرد حملے پر گہرے دکھ اور افسوس کا اظہار کرتے ہوئے متاثرین کے اہلِ خانہ سے تعزیت کی اور زخمیوں کی جلد صحتیابی کے لیے دعا کی۔ انہوں نے کہا کہ پاکستان خود دہشتگردی سے شدید متاثر رہا ہے اور ایسے حملوں کے درد اور صدمے کو بخوبی سمجھتا ہے۔ صدر مملکت نے دہشتگردی کے خلاف پاکستان کے اصولی مؤقف کا اعادہ بھی کیا۔
وزیراعظم شہباز شریف نے سوشل میڈیا پلیٹ فارم ایکس پر اپنے پیغام میں سڈنی حملے کے متاثرین سے دلی ہمدردی کا اظہار کیا۔ انہوں نے کہا کہ پاکستان ہر قسم کی دہشتگردی کی مذمت کرتا ہے اور اس مشکل وقت میں آسٹریلوی عوام اور حکومت کے ساتھ کھڑا ہے۔
واضح رہے کہ آسٹریلیا کے شہر سڈنی میں یہودیوں کے تہوار کے دوران فائرنگ کے واقعے میں 12 افراد ہلاک اور 29 زخمی ہوگئے، جن میں دو پولیس اہلکار بھی شامل ہیں۔ سڈنی پولیس کے مطابق ایک حملہ آور جوابی کارروائی میں مارا گیا جبکہ دوسرے کو شدید زخمی حالت میں گرفتار کرلیا گیا۔ پولیس نے واقعے کو دہشتگردی قرار دیا ہے۔