ویب ڈیسک: مسلسل بڑھتی ہوئی کشیدگی کے باعث کمبوڈیا نے تھائی لینڈ کے ساتھ تمام سرحدی گزرگاہیں بند کرنے کا اعلان کر دیا ہے۔
خبر ایجنسی کے مطابق کمبوڈین حکام کا کہنا ہے کہ تھائی لینڈ کی فوج کی جانب سے کیے گئے حملوں میں متعدد شہری جاں بحق ہوئے ہیں جبکہ انفراسٹرکچر کو بھی شدید نقصان پہنچا ہے۔
دوسری جانب تھائی لینڈ اور کمبوڈیا کے درمیان حالیہ کشیدگی پر وائٹ ہاؤس کی جانب سے جاری بیان میں دونوں ممالک پر زور دیا گیا ہے کہ وہ جنگ بندی معاہدے کا احترام کریں۔ بیان میں کہا گیا کہ صدر ڈونلڈ ٹرمپ کو امید ہے کہ فریقین معاہدے کی پاسداری کرتے ہوئے کشیدگی میں کمی لائیں گے۔
واضح رہے کہ گزشتہ روز امریکی صدر ڈونلڈ ٹرمپ نے تھائی لینڈ اور کمبوڈیا کے درمیان فائر بندی کا دعویٰ کرتے ہوئے کہا تھا کہ دونوں ممالک امن کے لیے تیار ہیں اور امریکا کے ساتھ تجارتی تعلقات بھی برقرار رکھے ہوئے ہیں۔
یہ بھی یاد رہے کہ گزشتہ ماہ تھائی لینڈ نے کمبوڈیا کے ساتھ امریکی ثالثی میں طے پانے والے امن معاہدے پر عملدرآمد روک دیا تھا۔ تھائی لینڈ کی جانب سے معاہدے کی معطلی کا اعلان سرحد کے قریب بارودی سرنگ کے دھماکے میں اس کے دو فوجیوں کے زخمی ہونے کے بعد سامنے آیا تھا۔
