حکومت کا عمران خان کو اڈیالہ جیل سے منتقل کرنے پر غور

وزیراعظم کے کوآرڈینیٹر برائے اطلاعات و امور خیبر پختونخوا، اختیار ولی خان نے پی ٹی آئی پر سخت تنقید کرتے ہوئے کہا کہ پی ٹی آئی ملک میں عدم استحکام پیدا کرنے کے ایجنڈے پر عمل پیرا ہے اور احتجاج کے نام پر فتنہ و فساد پھیلانے کی کوشش کی جا رہی ہے۔

ایک نیوز کانفرنس میں بات کرتے ہوئے انہوں نے کہا کہ حکومت نے قیدی نمبر 804 (عمران خان) کو اڈیالہ جیل سے منتقل کرنے کے حوالے سے سنجیدگی سے غور شروع کر دیا ہے تاکہ عوامی زندگی میں مشکلات کم کی جا سکیں۔ انہوں نے مزید کہا کہ پی ٹی آئی کی سیاست ملک میں انتشار اور تشدد پھیلانے پر مبنی ہے اور اس کا رویہ دہشت گردی سے کم نہیں ہے۔

اختیار ولی خان نے کہا کہ پی ٹی آئی نے نہ صرف فوج اور عدلیہ کے خلاف بیانات دیے ہیں بلکہ ملک کی نوجوان نسل کو نفرت کی سیاست کا شکار بھی بنایا ہے۔ ان کا کہنا تھا کہ پی ٹی آئی نے اپنے دور حکومت میں کوئی قابل ذکر ترقیاتی منصوبے نہیں کیے اور خیبرپختونخوا میں 13 سالوں میں کوئی نیا ہسپتال یا یونیورسٹی نہیں بنائی۔

انہوں نے پی ٹی آئی کی سوشل میڈیا سرگرمیوں پر بھی سوال اٹھایا اور الزام لگایا کہ پی ٹی آئی کے سوشل میڈیا اکاؤنٹس بھارت اور اسرائیل سے آپریٹ کیے جا رہے ہیں۔ اس کے علاوہ، انہوں نے بھارتی میڈیا پر بھی تنقید کرتے ہوئے کہا کہ وہ بانی پی ٹی آئی کی بہنوں کے جھوٹے بیانیے کو بڑھا چڑھا کر پیش کر رہا ہے۔

اختیار ولی خان نے واضح کیا کہ پی ٹی آئی کے ساتھ مذاکرات کے تمام دروازے بند ہو چکے ہیں اور ملک میں "عشق پاکستان” اور "عشق عمران” کے درمیان واضح تقسیم ہو چکی ہے۔ انہوں نے کہا کہ پی ٹی آئی نے ہمیشہ ملک کو نقصان پہنچایا اور 9 مئی اور 26 نومبر جیسے واقعات کی مثالیں دی۔

گورنر راج کے حوالے سے سوال پر انہوں نے کہا کہ جمہوری قوتیں کبھی بھی گورنر راج کو پسند نہیں کرتیں، اور اگر حکومت کو گورنر راج لگانا ہوتا تو وہ 26 نومبر کے واقعہ کے بعد ایسا کر چکی ہوتی۔

آخر میں، اختیار ولی خان نے پی ٹی آئی کی سیاست پر تنقید کرتے ہوئے کہا کہ پی ٹی آئی کو خون چاہیے اور وہ ہمیشہ تشدد اور انتشار کا راستہ اختیار کرتی ہے، جبکہ حکومت نے ہمیشہ امن و سکون کی جانب قدم بڑھایا ہے۔