واشنگٹن/بیجنگ — امریکی صدر ڈونلڈ ٹرمپ نے چینی صدر شی جن پنگ کے ساتھ تقریباً ایک گھنٹے طویل "بہت اچھی اور مثبت” ٹیلی فونک گفتگو کے بعد اعلان کیا ہے کہ وہ اپریل 2026 میں بیجنگ کا سرکاری دورہ کریں گے۔ اس کے ساتھ ہی صدر ٹرمپ نے شی جن پنگ کو 2026 کی دوسری نصف میں امریکہ کے دورے کی دعوت بھی دی، جسے چینی صدر نے قبول کر لیا ہے۔
دونوں رہنماؤں کے درمیان ہونے والی گفتگو میں یوکرین کی جنگ، تائیوان کے تنازع، اور سویا بین کی دوطرفہ تجارت سمیت کئی اہم عالمی و علاقائی مسائل پر بات چیت کی گئی۔
چینی صدر شی جن پنگ نے گفتگو کے دوران کہا کہ تائیوان کا چین کے ساتھ دوبارہ اتحاد دوسری عالمی جنگ کے بعد کے بین الاقوامی نظام کا لازمی حصہ ہے، اور بیجنگ اس موقف سے پیچھے نہیں ہٹے گا۔
دونوں ممالک نے رابطے جاری رکھنے اور سفارتی سطح پر تعاون بڑھانے پر اتفاق کیا ہے، جسے عالمی سطح پر امریکہ اور چین کے درمیان تناؤ میں ممکنہ کمی کے طور پر دیکھا جارہا ہے۔
