آئندہ برس مون سون کے نقصانات سے بچنے کیلئے ابھی سے تیاری کی جائے؛ وزیراعظم

وزیراعظم شہباز شریف نے موسمیاتی تبدیلی سے نمٹنے کے لیے صوبوں کے ساتھ مل کر ایک مربوط منصوبہ بندی کی ہدایت کی ہے اور کہا ہے کہ پیش کردہ قلیل مدتی منصوبے پر فوری عملدرآمد شروع کیا جائے۔
وزیراعظم کی زیرصدارت موسمیاتی تبدیلی سے متعلق حکومتی حکمت عملی پر جائزہ اجلاس ہوا، جس میں وزیر اعظم کو آئندہ سال مون سون کے حوالے سے عالمی تخمینوں اور وزارت موسمیاتی تبدیلی کی جانب سے تیار کردہ قلیل، وسط اور طویل مدتی منصوبوں پر بریفنگ دی گئی۔
اجلاس میں شہباز شریف نے آئندہ مون سون میں کسی بھی جانی و مالی نقصان سے بچنے کے لیے تیاری کرنے کی ضرورت پر زور دیا اور قلیل مدتی منصوبوں کی منظوری دی۔ انہوں نے کہا کہ ان منصوبوں پر فوری عملدرآمد کرنا ضروری ہے اور نیشنل واٹر کونسل کا اجلاس جلد منعقد کرنے کی ہدایت کی۔
وزیراعظم نے کہا کہ موسمیاتی تبدیلی کے اثرات سے بچنے کے لیے ابھی سے تیاری کی جائے اور اس سلسلے میں وزارت موسمیاتی تبدیلی، وزارت منصوبہ بندی اور این ڈی ایم اے ایک مربوط حکمت عملی تیار کریں۔ انہوں نے مزید کہا کہ موسمیاتی تبدیلی کے اثرات کی وجہ سے ہر تیسرے سال جی ڈی پی کا ایک خاطر خواہ حصہ خرچ ہوتا ہے، جو کہ محدود وسائل کو ترقی کے بجائے موسمیاتی تبدیلی کے نقصانات سے بچاؤ کے لیے استعمال کرنے کی ضرورت کو اجاگر کرتا ہے۔
وزیراعظم نے اس بات پر بھی زور دیا کہ پاکستان کا موسمیاتی تبدیلی میں کردار کم ہے، لیکن پاکستان ان اثرات کا شکار ہے جن کی وجہ سے اس کی معیشت اور عوام پر سنگین اثرات مرتب ہو رہے ہیں۔