کینٹکی (انٹرنیشنل ڈیسک) — امریکی ریاست کینٹکی میں ایک خاتون اس وقت شدید صدمے میں آ گئیں جب انہیں ڈاک کے ذریعے ادویات کے بجائے انسانی اعضا پر مشتمل پیکج موصول ہوا۔
امریکی میڈیا کے مطابق خاتون نے آن لائن ادویات کا آرڈر دیا تھا، تاہم جب انہوں نے پیکج کھولا تو اس میں انسانی بازو اور انگلیاں برف میں محفوظ حالت میں موجود تھیں۔
خاتون نے فوراً 911 پر کال کر کے حکام کو اطلاع دی، جس کے بعد کرسچن کاؤنٹی کے کورونر اسکاٹ ڈینیئل موقع پر پہنچے اور انسانی باقیات کو اپنی تحویل میں لے کر مقامی مردہ خانے منتقل کیا۔
رپورٹس کے مطابق پیکج میں دو انسانی بازو اور چار انگلیاں شامل تھیں، جو ایک کورئیر کمپنی کے ذریعے بھیجی گئی تھیں۔ ابتدائی تحقیقات میں پتہ چلا کہ یہ پیکج دراصل نیش وِل (Nashville) سے بھیجا گیا تھا اور کسی میڈیکل اسکول یا اسپتال کے سرجیکل ٹریننگ سینٹر کے لیے مخصوص تھا، لیکن غلطی سے خاتون کے پتے پر پہنچ گیا۔
کورونر کے مطابق پیکج میں موجود اعضا چار مختلف افراد کے جسموں سے تعلق رکھتے تھے۔ تاہم نہ تو کورئیر کمپنی کا نام ظاہر کیا گیا ہے اور نہ ہی پیکج وصول کرنے والی خاتون کی شناخت سامنے آئی ہے۔
اسکاٹ ڈینیئل نے میڈیا سے گفتگو میں کہا،
“میں نے تفصیل سے نہیں پوچھا، لیکن غالباً یہ کسی میڈیکل انسٹیٹیوٹ میں تربیت کے لیے عطیہ کردہ لاشوں کے اعضا ہوں گے۔”
انہوں نے مزید کہا کہ خاتون نے بروقت اطلاع دے کر درست قدم اٹھایا، کیونکہ یہ ایک “سنگین اور غیر معمولی واقعہ” تھا۔
دلچسپ طور پر، ایک دن بعد خاتون کو اُن کی اصل دوائیاں بھی موصول ہو گئیں۔
