پاک افغان مذاکرات پر بھارت کی پریشانی بڑھنے لگی ہے: وزیر دفاع

اسلام آباد / راولپنڈی: وزیر دفاع خواجہ آصف نے کہا ہے کہ افغانستان میں دہشتگردوں کا جلسہ ہو رہا ہے، جو خود افغانستان کے لیے بھی ایک لمحہ فکریہ ہونا چاہیے۔ انہوں نے بتایا کہ بات چیت کے عمل کا کریڈٹ ترکیہ اور قطر کو جاتا ہے، اور اگر یہ مذاکرات کامیاب ہوئے تو بھارت کے لیے یہ ایک بڑی مایوسی ہوگی کیونکہ بھارت کا کابل میں بیٹھے گروپوں کے ساتھ گہرا تعلق ہے۔

خواجہ آصف نے واضح کیا کہ پاکستان دہشتگردوں کو ایکسپورٹ نہیں کرتا بلکہ ان سے نمٹنے کے لیے عملی اقدامات کر رہا ہے۔ انہوں نے مزید کہا کہ مذاکرات سے متعلق تفصیلات 6 نومبر کو طے ہوں گی اور پاکستان امید رکھتا ہے کہ یہ عمل خطے میں امن اور استحکام لانے میں مددگار ہوگا۔

پاکستان میں افغان باشندوں اور غیر ملکیوں کے خلاف کریک ڈاؤن

دوسری جانب، پاکستان میں غیر قانونی طور پر مقیم افغان شہریوں اور دیگر غیر ملکیوں کے خلاف کریک ڈاؤن جاری ہے۔ راولپنڈی میں 18 مالک مکان گرفتار کیے گئے جو افغان شہریوں کو کرائے پر مکان دے رہے تھے، جبکہ 216 افغان شہریوں کو تحویل میں لے کر ہولڈنگ سینٹر منتقل کیا گیا۔ لاہور کے رائے ونڈ میں بھی ایک مالک مکان کے خلاف مقدمہ درج کیا گیا۔

پنجاب پولیس کے مطابق صوبے بھر میں اعلانات کیے جا رہے ہیں کہ کوئی بھی شہری غیر قانونی مقیم افغان یا دیگر غیر ملکیوں کو مکان یا دکان کرائے پر نہ دے۔ پولیس نے خبردار کیا کہ قانون کی خلاف ورزی کرنے والوں کے خلاف سخت کارروائی کی جائے گی۔

افغان مہاجرین کی وطن واپسی جاری

چمن اور طورخم کے راستے افغان مہاجرین کی وطن واپسی بھی جاری ہے۔ حکام کے مطابق اب تک تقریباً 1.6 ملین افغان باشندے اپنے وطن واپس جا چکے ہیں۔ پاکستانی حکام کا کہنا ہے کہ سرحدیں انسانی ہمدردی کی بنیاد پر کھولی گئی ہیں تاکہ وہاں پھنسے افغان شہری باحفاظت اپنے ملک واپس جا سکیں۔