پنجاب میں غیر قانونی مقیم غیر ملکیوں کے انخلا کا تیسرا مرحلہ جاری

رپورٹ: علی ساہی

پنجاب بھر میں غیر قانونی طور پر مقیم غیر ملکی باشندوں کے انخلا کا تیسرا مرحلہ منظم انداز میں جاری ہے۔ ترجمان پنجاب پولیس کے مطابق اب تک مجموعی طور پر 21 ہزار 900 سے زائد افراد کو ملک بدر کیا جا چکا ہے۔

پولیس کے فراہم کردہ اعداد و شمار کے مطابق، ملک بدر کیے گئے افراد میں 7656 مرد، 4745 خواتین اور 9508 بچے شامل ہیں۔ اس وقت بھی 423 غیر قانونی مقیم افراد مختلف ہولڈنگ پوائنٹس پر موجود ہیں، جہاں سے ان کا انخلا آئندہ مراحل میں مکمل کیا جائے گا۔

کون کون شامل ہے؟

ترجمان کے مطابق، 6007 ایسے غیر ملکی بھی ملک بدر کیے گئے جن کے پاس رہائشی دستاویزات موجود تھیں، جبکہ 10861 افغان سٹیزن کارڈ رکھنے والے افراد اور 5041 غیر قانونی طور پر مقیم غیر ملکی بھی انخلا کے عمل کا حصہ بنے۔

ہولڈنگ سینٹرز اور سیکیورٹی انتظامات

لاہور میں 5 جبکہ پورے صوبہ پنجاب میں 46 ہولڈنگ سینٹرز قائم کیے گئے ہیں، جہاں سے انخلا کا عمل شفاف اور مرحلہ وار جاری ہے۔ ان مراکز پر غیر ملکیوں کو رجسٹریشن، ابتدائی سہولیات اور قانونی کارروائی کے بعد واپس بھیجا جا رہا ہے۔

قانونی اور انسانی پہلوؤں کا خیال

آئی جی پنجاب نے اس موقع پر کہا کہ پورے صوبے میں سیکیورٹی ہائی الرٹ ہے، اور انخلا کا عمل قانونی تقاضوں اور انسانی حقوق کو مدنظر رکھتے ہوئے مکمل کیا جا رہا ہے۔ ان کے مطابق پنجاب پولیس وفاقی حکومت کی پالیسی کے مطابق اس عمل پر مکمل عملدرآمد کر رہی ہے۔