لندن (مانیٹرنگ ڈیسک) — بانی تحریک انصاف عمران خان کی سابق اہلیہ جمائما گولڈ اسمتھ کی والدہ اور معروف سماجی شخصیت لیڈی اینابیل گولڈ اسمتھ 91 برس کی عمر میں لندن میں انتقال کر گئیں۔
میڈیا رپورٹس کے مطابق لیڈی اینابیل 11 جون 1934 کو لندن میں پیدا ہوئیں۔ وہ چھ بچوں کی والدہ تھیں، جن میں جمائما گولڈ اسمتھ اور رچمنڈ پارک سے سابق رکنِ پارلیمنٹ زیک گولڈ اسمتھ شامل ہیں۔
رپورٹ کے مطابق ان کے دو بیٹے المناک حالات میں جان کی بازی ہار گئے — ایک مغربی افریقہ میں انتقال کر گیا جبکہ دوسرے کو شیر نے ہلاک کر دیا۔
لیڈی اینابیل کی زندگی کئی حوالوں سے منفرد اور دلچسپ رہی۔ ان کے شوہر، سر جیمز گولڈ اسمتھ نے لندن کے مے فئیر علاقے میں قائم مشہور نائٹ کلب ’اینابیل‘ کا نام اپنی اہلیہ کے نام پر رکھا، جو بعد ازاں شاہی خاندان کے افراد سمیت ممتاز شخصیات کی توجہ کا مرکز بنا۔
محض 15 برس کی عمر میں "لیڈی” کا خطاب حاصل کرنے والی اینابیل کی پہلی شادی مارک برلے سے ہوئی جو 21 برس تک قائم رہی، جبکہ دوسری شادی 1978 میں سر جیمز گولڈ اسمتھ سے ہوئی۔
ان کے بیٹے زیک گولڈ اسمتھ کو برطانوی اعزازی ٹائٹل "لارڈ” دیا گیا۔ انہوں نے 2016 میں لندن کے میئر کے انتخاب میں صادق خان کے خلاف الیکشن بھی لڑا تھا۔
واضح رہے کہ لیڈی اینابیل کی بیٹی جمائما گولڈ اسمتھ نے 1995 میں عمران خان سے شادی کی تھی، جو بعد ازاں 2004 میں علیحدگی پر منتج ہوئی۔
لیڈی اینابیل کی وفات پر سیاسی، سماجی اور بین الاقوامی شخصیات کی جانب سے تعزیت کا سلسلہ جاری ہے۔ ان کی زندگی اور خدمات کو برطانیہ میں ایک اہم سماجی ورثے کے طور پر یاد رکھا جائے گا۔
