بھارتی فوجی قیادت کو خبردار کرتا ہوں نیوکلیئر انوائرمنٹ میں دونوں ممالک میں جنگ کیلئے گنجائش نہیں ، فیلڈ مارشل سید عاصم منیر کا دوٹوک پیغام:

ایبٹ آباد (نمائندہ خصوصی) — چیف آف آرمی اسٹاف اور فیلڈ مارشل سید عاصم منیر نے بھارتی فوجی قیادت کو دوٹوک پیغام دیتے ہوئے کہا ہے کہ نیوکلیئر انوائرمنٹ میں دونوں ممالک کے درمیان جنگ کی کوئی گنجائش نہیں، اور کسی بھی جارحیت کا جواب دشمن کی توقعات سے کہیں زیادہ سخت ہو گا۔

یہ بات انہوں نے پاکستان ملٹری اکیڈمی (پی ایم اے) کاکول میں منعقدہ پاسنگ آؤٹ پریڈ کی شاندار تقریب سے خطاب کرتے ہوئے کہی۔

"قوم اپنی فوج کے ساتھ فولاد کی طرح کھڑی ہے”

آرمی چیف نے کہا کہ آپریشن بنیان مرصوص کے دوران پوری قوم اپنی فوج کے ساتھ فولادی اتحاد کی علامت بنی رہی، اور اس آپریشن سے عوام کے فوج پر اعتماد میں مزید اضافہ ہوا۔

دشمن کے خلاف پیشہ ورانہ کارروائیاں

فیلڈ مارشل نے انکشاف کیا کہ پاکستان نے دشمن کے خلاف انتہائی پیشہ ورانہ انداز میں کارروائیاں کیں، جن میں رافیل طیارے مار گرائے گئے، دشمن کے ایس-400 دفاعی نظام کو نشانہ بنایا گیا، اور ملٹی ڈومین وارفیئر کی صلاحیتوں کا عملی مظاہرہ کیا گیا۔

"اللہ کے فضل اور قومی عزم سے ہم متحد ہوکر فولادی دیوار کی مانند دشمن کے سامنے ڈٹ گئے۔”

بھارت کو واضح پیغام

انہوں نے کہا کہ بھارت کی جانب سے پاکستان پر بے بنیاد الزامات لگانا اس بات کا ثبوت ہے کہ بھارتی حکمران جماعت اپنے سیاسی مفادات کے لیے دہشت گردی جیسے حساس موضوعات کو استعمال کر رہی ہے۔

"پاکستان کا دفاعی نظریہ کریڈیبل ڈیٹرنس اور دائمی تیاری پر مبنی ہے۔ اگر دوبارہ جارحیت کی کوشش کی گئی تو ہمارا ردِعمل دشمن کے لیے ناقابلِ تصور حد تک شدید ہوگا۔”

قومی اتحاد و قربانیوں کو خراج تحسین

آرمی چیف نے ہر سپاہی، فضائیہ و بحریہ کے جوانوں، خواتین، بچوں، بزرگوں اور شہداء کو خراجِ تحسین پیش کرتے ہوئے کہا کہ:

"ہم اس مقدس سرزمین کا ایک انچ بھی دشمن کے حوالے نہیں ہونے دیں گے، اور شہداء کی قربانیوں کو کبھی فراموش نہیں کیا جائے گا۔”

"افواج پاکستان دنیا کی بہترین فوج”

انہوں نے کہا کہ افواجِ پاکستان دنیا کی بہترین اور پیشہ ور افواج میں شمار ہوتی ہیں، لیکن دشمن قوتیں عوام اور فوج کے درمیان دراڑ ڈالنے کے لیے سرگرم ہیں۔ تاہم پوری قوم اور فوج ان سازشوں کے سامنے سیسہ پلائی دیوار بنی ہوئی ہے۔

پی ایم اے کاکول میں شاندار پاسنگ آؤٹ پریڈ

تقریب میں:

152 واں لانگ کورس

37 واں ٹیکنیکل گریجویٹ کورس

71 واں اینٹی گریٹڈ کورس

26 واں لیڈی کیڈٹ کورس

کے کیڈٹس نے پاس آؤٹ کیا۔
پاس آؤٹ کیڈٹس میں 40 دوست ممالک کے فوجی بھی شامل تھے، جن کا تعلق عراق، مالدیپ، نیپال، فلسطین، سری لنکا، قطر، بنگلہ دیش، یمن، مالی اور نائیجیریا جیسے ممالک سے تھا۔

اعزازی شمشیریں اور شیلڈز تقسیم

فیلڈ مارشل عاصم منیر نے پریڈ کا معائنہ کیا اور نمایاں کارکردگی دکھانے والے کیڈٹس کو اعزازی شمشیر، شیلڈز اور دیگر اعزازات سے نوازا۔ ان کی آمد پر شرکاء نے کھڑے ہو کر پرتپاک استقبال کیا۔

یہ تقریب نہ صرف پاکستان کی دفاعی قوت کا مظہر بنی، بلکہ دشمن کو بھی واضح پیغام دے گئی کہ پاکستان امن کا خواہاں ضرور ہے، لیکن دفاع کے لیے مکمل تیار بھی ہے۔