آج ملک بھر میں انٹرنیٹ سست یا جزوی طور پر معطل رہے گا

اسلام آباد (14 اکتوبر 2025) — پاکستان میں آج انٹرنیٹ صارفین کو سست روی یا جزوی بندش کا سامنا کرنا پڑ سکتا ہے، کیونکہ بین الاقوامی انٹرنیٹ کیبل نیٹ ورک میں ضروری تکنیکی مرمت کا عمل شروع کر دیا گیا ہے۔

پی ٹی سی ایل گروپ کے ترجمان کے مطابق، یہ مرمتی کام ایک بین الاقوامی کیبل کنسورشیم کے تحت کیا جا رہا ہے، جس میں سمندر میں بچھائی گئی کیبل میں نصب ایک اہم رپیٹر کی مرمت شامل ہے۔ مرمت کا عمل آج صبح 11 بجے سے شروع ہو چکا ہے اور اس کے تقریباً 18 گھنٹے جاری رہنے کا امکان ہے۔

ترجمان کا کہنا تھا کہ مرمتی عمل کے دوران ملک بھر میں انٹرنیٹ کی رفتار میں کمی واقع ہو سکتی ہے جبکہ بعض علاقوں میں سروس جزوی طور پر معطل بھی رہ سکتی ہے۔ تاہم، انہوں نے واضح کیا کہ یہ تکنیکی کام انٹرنیٹ نیٹ ورک کے استحکام اور مسلسل بہتری کے لیے ناگزیر ہے۔

پی ٹی سی ایل گروپ نے صارفین سے اس عارضی تکلیف پر معذرت کا اظہار کرتے ہوئے یقین دہانی کرائی ہے کہ مرمت مکمل ہوتے ہی انٹرنیٹ سروس مکمل طور پر بحال کر دی جائے گی، اور صارفین کو معمول کے مطابق تیز رفتار انٹرنیٹ مہیا کیا جائے گا۔