واشنگٹن: سابق امریکی صدر ڈونلڈ ٹرمپ نے امریکی فوجی جنرلز سے خطاب کے دوران فیلڈ مارشل سید عاصم منیر کی تعریف کرتے ہوئے ان کی بصیرت اور قیادت کو سراہا ہے۔ اپنے خطاب میں صدر ٹرمپ نے انکشاف کیا کہ تین روز قبل ان کی پاکستان کے وزیراعظم شہباز شریف اور فیلڈ مارشل عاصم منیر سے ملاقات ہوئی، جس میں علاقائی امن اور پاک-بھارت تعلقات پر تفصیلی گفتگو ہوئی۔
صدر ٹرمپ نے بتایا کہ ملاقات کے دوران فیلڈ مارشل عاصم منیر نے اُن کی کوششوں کو سراہتے ہوئے کہا:
"آپ نے جنگ رکوا کر لاکھوں جانیں بچائیں، اگر جنگ ہو جاتی تو بہت زیادہ نقصان ہوتا۔”
سابق صدر نے مزید کہا کہ فیلڈ مارشل عاصم منیر کا یہ انداز اور ان کے الفاظ میرے لیے نہایت اعزاز کی بات تھے۔
"پاکستان کے فیلڈ مارشل کا انداز مجھے بے حد پسند آیا، اور ان کی تعریف کو میں نے اپنے لیے فخر کا مقام تصور کیا،” ٹرمپ کا کہنا تھا۔
ٹرمپ نے ایک بار پھر دعویٰ کیا کہ اُن کی قیادت میں انہوں نے سات بڑی جنگیں ختم کرائیں، جن میں سب سے نمایاں پاک-بھارت جنگ کو روکنا تھا، جو ان کے بقول ایٹمی جنگ میں بھی تبدیل ہوسکتی تھی۔
اپنے خطاب کے اختتام پر ڈونلڈ ٹرمپ نے نوبیل انعام سے محرومی پر شکوہ کرتے ہوئے کہا:
"دنیا کی سات جنگیں رکوانے اور کل ہی غزہ جنگ کے تصفیے کے باوجود مجھے نوبیل انعام نہیں دیا جائے گا، جو سراسر ناانصافی ہوگی۔”
انہوں نے مزید کہا کہ نوبیل انعام شاید پھر کسی ایسے شخص کو دے دیا جائے گا جس نے کوئی قابلِ ذکر کارنامہ سرانجام نہ دیا ہو، جو امریکی عوام کے ساتھ زیادتی تصور کی جائے گی۔
یہ بیان اس وقت سامنے آیا ہے جب دنیا بھر میں مختلف تنازعات اور جنگوں کے حل کے لیے عالمی طاقتوں کی کوششوں پر نظر رکھی جا رہی ہے، اور صدر ٹرمپ ایک بار پھر خود کو عالمی امن کا علمبردار ثابت کرنے کی کوشش کر رہے ہیں۔
