پاکستان کو ایک بار پھر سیلاب کی ہولناک صورتحال کا سامنا ہے: اسحاق ڈار

اسلام آباد (نمائندہ خصوصی) —
نائب وزیر اعظم اسحاق ڈار نے کہا ہے کہ پاکستان کو ایک بار پھر سیلاب کی سنگین اور ہولناک صورتحال کا سامنا ہے، جس کے نتیجے میں لاکھوں افراد متاثر ہو چکے ہیں۔

وہ انٹر پارلیمانی اسپیکرز کانفرنس سے خطاب کر رہے تھے، جہاں انہوں نے عالمی برادری کو ماحولیاتی تبدیلیوں سے پیدا ہونے والے خطرات سے خبردار کیا۔ ان کا کہنا تھا کہ پاکستان کا عالمی سطح پر کاربن کے اخراج میں حصہ ایک فیصد سے بھی کم ہے، لیکن اس کے باوجود پاکستان ماحولیاتی تباہ کاریوں کا بڑا شکار ہے۔

اسحاق ڈار نے عالمی سطح پر ماحولیاتی انصاف کے لیے آواز بلند کرنے کی ضرورت پر زور دیتے ہوئے کہا کہ:

"ہمیں اجتماعی طور پر آگے آنا ہوگا اور ماحولیاتی انصاف کے لیے آواز بلند کرنی ہوگی۔”

انہوں نے کہا کہ امن، استحکام اور ترقی کا آپس میں گہرا تعلق ہے، اور ان مقاصد کے حصول کے لیے بین الاقوامی پارلیمانی تعاون ناگزیر ہے۔

نائب وزیر اعظم کا مزید کہنا تھا کہ:

"پارلیمانی لیڈرز کے درمیان روابط اور تبادلے وقت کی اہم ضرورت ہیں۔ پارلیمانی سفارتکاری مذاکرات، باہمی احترام اور رابطوں کے فروغ میں اہم کردار ادا کر سکتی ہے۔”

انہوں نے اس بات پر بھی زور دیا کہ پائیدار علاقائی امن اور استحکام کے لیے خطے کے ممالک کو مل کر کام کرنا ہوگا۔