لاہور (نمائندہ خصوصی) – پنجاب اسمبلی کا 30 واں اجلاس آج دوپہر 2 بجے اسپیکر ملک محمد احمد خان کی زیر صدارت شروع ہوگا۔ اجلاس کے لیے باضابطہ ایجنڈا جاری کر دیا گیا ہے، جس میں متعدد اہم عوامی اور حکومتی معاملات زیر بحث آئیں گے۔
اجلاس کے دوران محکمہ جنگلات (فاریسٹ) سے متعلق ارکان اسمبلی کے سوالات کے جوابات دیے جائیں گے، جبکہ مختلف عوامی مسائل پر اراکین کی جانب سے توجہ دلاؤ نوٹس بھی پیش کیے جائیں گے۔
تین تحریکات التواء، سیلابی صورتحال پر عام بحث
ایوان کی کارروائی میں تین تحریکات التواء پر بحث متوقع ہے، جو فوری نوعیت کے معاملات سے متعلق ہوں گی۔ اجلاس کے دوران حالیہ سیلابی صورتحال پر عام بحث کا آغاز بھی کیا جائے گا۔ اراکین اسمبلی متاثرہ علاقوں کی صورتحال، نقصانات، حکومتی اقدامات اور مستقبل کی حکمت عملی پر روشنی ڈالیں گے۔
عوامی مسائل بھی ایوان میں اٹھائے جائیں گے
اسمبلی اجلاس میں اراکین کی جانب سے صوبے بھر کے اہم عوامی مسائل پر بھی گفتگو کی جائے گی، جن میں تعلیم، صحت، بلدیاتی مسائل اور امن و امان کی صورتحال نمایاں موضوعات ہوں گے۔
موجودہ ہنگامی صورتحال کے پیشِ نظر ایوان کی کارروائی میں خاصی سرگرمی اور سنجیدہ بحث متوقع ہے۔
