اسلام آباد: محکمہ موسمیات نے ملک کے مختلف حصوں میں تیز ہواؤں، گرج چمک اور موسلادھار بارش کی پیشگوئی جاری کر دی ہے۔ آئندہ چند روز کے دوران پاکستان کے بالائی اور مشرقی علاقوں میں موسم غیر مستحکم رہنے کا امکان ہے، جس کے نتیجے میں کئی علاقوں میں بارش کے ساتھ معمولاتِ زندگی متاثر ہونے کا خدشہ ہے۔
اسلام آباد اور شمال مشرقی پنجاب میں بارش کا امکان
ترجمان محکمہ موسمیات کے مطابق اسلام آباد اور گرد و نواح میں گرج چمک کے ساتھ بارش متوقع ہے، جبکہ شمال مشرقی پنجاب میں بعض مقامات پر تیز اور موسلا دھار بارش ہو سکتی ہے، جس سے نشیبی علاقوں میں پانی جمع ہونے اور ٹریفک کی روانی متاثر ہونے کا امکان ہے۔
بارش کی زد میں آنے والے علاقے:
پنجاب:
راولپنڈی، مری، گلیات، لاہور، گوجرانوالہ، گجرات، سیالکوٹ، شیخوپورہ، فیصل آباد، جھنگ، قصور، نارووال، منڈی بہاؤالدین، حافظ آباد، وزیرآباد، اوکاڑہ، ساہیوال، بہاولنگر، چکوال، جہلم، چینوٹ، اور ڈیرہ غازی خان۔
خیبرپختونخوا:
سوات، کوہستان، شانگلہ، بٹگرام، مانسہرہ، بونیر، کوہاٹ، کرم، اورکزئی، خیبر، اور ہنگو۔
بلوچستان:
بارکھان، ژوب، موسیٰ خیل، لورالائی، کوہلو، سبی، ڈیرہ بگٹی، قلات، خضدار، اور لسبیلہ۔
سندھ:
کراچی، حیدرآباد، تھرپارکر، دادو، سانگھڑ، میرپورخاص، بدین، عمرکوٹ، مٹھی اور ٹھٹھہ — ان علاقوں میں شام یا رات کے وقت بارش کا امکان ہے۔
آزاد کشمیر اور گلگت بلتستان:
تیز ہواؤں اور گرج چمک کے ساتھ بارش کی توقع ظاہر کی گئی ہے۔
رات کے وقت شدید بارش کی وارننگ
محکمہ موسمیات نے خبردار کیا ہے کہ بالائی خیبرپختونخوا، شمال مشرقی پنجاب اور کشمیر میں رات کے وقت موسلا دھار بارش متوقع ہے، جس کے باعث مقامی ندی نالوں میں طغیانی آ سکتی ہے۔ عوام کو ہدایت کی گئی ہے کہ وہ غیر ضروری سفر سے گریز کریں، احتیاطی تدابیر اختیار کریں اور مقامی انتظامیہ سے رابطے میں رہیں۔
