واشنگٹن (بین الاقوامی ڈیسک) — امریکی صدر ڈونلڈ ٹرمپ نے روسی صدر ولادیمیر پیوٹن اور یوکرینی صدر ولادیمیر زیلنسکی کے ساتھ ایک سہ فریقی ملاقات کے انعقاد کی خواہش ظاہر کی ہے تاکہ روس-یوکرین تنازع کا پرامن حل تلاش کیا جا سکے۔
ٹرمپ نے کہا ہے کہ یہ ملاقات صرف اس صورت ممکن ہوگی جب دونوں ممالک کی قیادت اس پر رضامند ہو۔ انہوں نے اعلان کیا کہ جمعے کو الاسکا میں ولادیمیر پیوٹن کے ساتھ ایک اہم سربراہی اجلاس کریں گے اور اس کے فوراً بعد یوکرین کے صدر زیلنسکی کو بھی شامل کر کے سہ فریقی بات چیت کی جائے گی۔
یہ ملاقات 2021 کے بعد کسی موجودہ امریکی صدر اور روسی صدر کے درمیان پہلی براہِ راست ملاقات ہوگی جسے عالمی سطح پر بہت اہمیت دی جا رہی ہے۔
تاہم، یوکرینی صدر زیلنسکی کو ابھی تک اس اجلاس میں باضابطہ دعوت نہیں دی گئی، جس سے خدشات پیدا ہو رہے ہیں کہ ممکن ہے ملاقات دوطرفہ رہے اور یوکرین کے مفادات متاثر ہوں۔
ٹرمپ نے اپنی انتخابی مہم میں بارہا وعدہ کیا تھا کہ وہ روس-یوکرین جنگ ختم کریں گے، لیکن ابھی تک کوئی واضح پیش رفت نہیں ہوئی۔
تجزیہ کاروں کا کہنا ہے کہ اگر زیلنسکی کو مذاکرات میں شامل کر لیا گیا تو یہ ایک بڑی سفارتی کامیابی ہوگی، لیکن اگر ملاقات یکطرفہ رہی تو خطے میں نئی پیچیدگیاں پیدا ہو سکتی ہیں۔
