شیخ وقاص کی رکنیت خطرے میں، قومی اسمبلی کا فیصلہ آج متوقع
اسلام آباد (13 اگست 2025): قومی اسمبلی کا اہم اجلاس آج صبح 11 بجے اسپیکر ایاز صادق کی صدارت میں ہوگا، جس میں اپوزیشن رکن شیخ وقاص اکرم کی نشست خالی قرار دینے کی تحریک پیش کیے جانے کا قوی امکان ہے۔ اسمبلی سیکرٹریٹ نے اجلاس کا 16 نکاتی ایجنڈا جاری کر دیا ہے۔
ایجنڈے کے مطابق، حکومتی رکن سیدہ نوشین افتخار ایوان میں تحریک پیش کریں گی، جس کی منظوری کے بعد شیخ وقاص اکرم کی رکنیت باضابطہ طور پر ختم کر دی جائے گی۔
اہم قانون سازی ایجنڈے کا حصہ
آج کے اجلاس میں کئی اہم اور اصلاحاتی نوعیت کے بل بھی منظوری کے لیے پیش کیے جائیں گے، جن میں شامل ہیں:
آسان کاروبار بل 2025
نیشنل اسکول آف پبلک پالیسی بل 2025
انسداد دہشت گردی ترمیمی بل 2025
پٹرولیم ترمیمی بل 2025
یہ بلز معیشت، نظم و نسق اور قومی سلامتی سے متعلق حکومتی پالیسیوں میں بہتری کے لیے کلیدی اہمیت رکھتے ہیں۔
عوامی مفادات سے متعلق نکات بھی ایجنڈے میں شامل
اجلاس میں دو توجہ دلاؤ نوٹس بھی ایجنڈے کا حصہ ہیں:
امریکی صدر کے تیل ذخائر سے متعلق بیان پر حکومتی خاموشی
اسلام آباد کے نجی اسپتالوں اور لیبارٹریوں میں زائد چارجز کی شکایات
