واشنگٹن (غیر ملکی نیوز ایجنسی) – کولمبیا یونیورسٹی کے بعد اب ہارورڈ یونیورسٹی نے بھی ٹرمپ انتظامیہ کے ساتھ جاری تنازع کو ختم کرنے کے لیے مالی ادائیگی کرنے پر آمادگی ظاہر کر دی ہے۔ میڈیا رپورٹس کے مطابق ہارورڈ یونیورسٹی نے اس سلسلے میں 500 ملین ڈالر وقف کرنے کا اعلان کیا ہے، تاہم حتمی مالی شرائط پر ابھی مذاکرات جاری ہیں۔
یہ تنازع امریکی محکمہ تعلیم کی جانب سے اپریل میں عائد کیے گئے الزامات کے بعد پیدا ہوا تھا، جس میں ہارورڈ پر حکومتی پالیسیوں کی خلاف ورزی کا الزام تھا، اور اس کے نتیجے میں یونیورسٹی کی 2.2 ارب ڈالر کی وفاقی امداد روکنے کا فیصلہ کیا گیا تھا۔
ٹرمپ انتظامیہ نے کولمبیا یونیورسٹی کی مثال دیتے ہوئے اعلان کیا تھا کہ تمام بڑی جامعات کو وفاقی فنڈنگ برقرار رکھنے کے لیے جرمانے ادا کرنا ہوں گے۔ اس سے قبل کولمبیا یونیورسٹی بھی حکومتی دباؤ کے بعد ایک معاہدے پر رضامند ہو چکی ہے، جس کے تحت وہ آئندہ تین سالوں میں امریکی حکومت کو 200 ملین ڈالر کی ادائیگی کرے گی۔ کولمبیا پر یہ الزام تھا کہ اس نے یہودی طلباء کی ہراسانی کے خلاف مناسب اقدامات نہیں کیے، جس کی وجہ سے اس کی 400 ملین ڈالر کی وفاقی امداد معطل کر دی گئی تھی۔
ہارورڈ یونیورسٹی کا یہ اقدام تعلیمی اداروں اور حکومت کے درمیان جاری کشیدگی میں ایک اہم موڑ سمجھا جا رہا ہے۔ اس سے امریکا کی اعلیٰ تعلیم کے شعبے میں پالیسی، آزادی اظہار، اور فنڈنگ کے درمیان توازن پر نئی بحث چھڑنے کا امکان ہے۔
