لاہور (اسپورٹس ڈیسک) – پاکستان کرکٹ بورڈ (پی سی بی) نے ڈومیسٹک کرکٹ کے معیار کو مزید بہتر بنانے اور کھلاڑیوں کی جسمانی فٹنس کو یقینی بنانے کے لیے 2025-26 کے سیزن سے قبل ایک نئی فٹنس پالیسی متعارف کروادی ہے۔ اس نئی پالیسی کے تحت تمام ریجنل اور ڈیپارٹمنٹل کرکٹرز کے لیے فٹنس ٹیسٹ لازمی قرار دیا گیا ہے۔
پی سی بی کے مطابق اگست میں اسٹرینتھ اینڈ کنڈیشننگ کوچز کی ٹیم تقریباً 400 ریجنل کھلاڑیوں کا فٹنس جائزہ لے گی، اور کھلاڑیوں کو پہلی یا دوسری کوشش میں فٹنس ٹیسٹ پاس کرنا ہوگا۔ اس سلسلے میں معیار پر کسی قسم کا سمجھوتہ نہیں کیا جائے گا۔
یہ پہلا موقع ہے کہ پی سی بی نے ڈیپارٹمنٹل ٹیموں کے کھلاڑیوں کے فٹنس ٹیسٹ بھی خود لینے کا فیصلہ کیا ہے تاکہ تمام کھلاڑی ایک ہی معیار پر پرکھے جا سکیں۔ مزید برآں، پاتھ ویز اور ایج گروپ کرکٹ کے لیے بھی ایک الگ فٹنس پالیسی ترتیب دی گئی ہے۔
لیڈ اسٹرینتھ اینڈ کنڈیشننگ کوچ یاسر ملک نے اس اقدام کو کرکٹ کے لیے ایک مثبت قدم قرار دیتے ہوئے کہا، "ڈومیسٹک کرکٹ پاکستان کرکٹ کا اصل ستون اور ٹیلنٹ کی نرسری ہے۔ ہم معیار پر کوئی سمجھوتہ نہیں کریں گے۔” انہوں نے کہا کہ نئی فٹنس پالیسی کا مقصد قومی ٹیم کے لیے زیادہ فٹ اور مقابلہ کرنے کے قابل کھلاڑی تیار کرنا ہے۔
پی سی بی کی یہ نئی فٹنس پالیسی پاکستان کرکٹ کی بہتری اور بین الاقوامی سطح پر بہتر کارکردگی کے لیے ایک اہم سنگ میل ثابت ہوگی۔
