لاہور (اسپورٹس ڈیسک) — پاکستان کرکٹ بورڈ (پی سی بی) نے ایک نجی تعلیمی ادارے کے ساتھ اہم معاہدہ کر لیا ہے جس کے تحت نوجوان کرکٹرز کو مفت تعلیمی اسکالرشپ فراہم کی جائے گی تاکہ وہ کرکٹ کے ساتھ تعلیم بھی جاری رکھ سکیں۔
معاہدے پر دستخط کی تقریب پی سی بی ہیڈ کوارٹر لاہور میں منعقد ہوئی، جس کے مہمانِ خصوصی چیئرمین پی سی بی محسن نقوی تھے۔ تقریب میں وائٹ بال ٹیم کے ہیڈ کوچ مائیک ہیسن، ڈائریکٹر ڈومیسٹک کرکٹ عبداللّٰہ خرم نیازی اور جی ایم ڈومیسٹک جنید ضیاء سمیت دیگر حکام شریک ہوئے۔
معاہدے پر پی سی بی کے چیف آپریٹنگ آفیسر سمیر احمد اور تعلیمی ادارے کے سی ای او قاسم قصوری نے دستخط کیے۔ معاہدے کے تحت ملک کے 16 ریجنز سے تعلق رکھنے والے انڈر 15، انڈر 17 اور انڈر 19 کیٹیگریز کے 120 نمایاں کھلاڑیوں کو مکمل مفت تعلیم فراہم کی جائے گی۔
یہ معاہدہ تین سال کے لیے نافذ العمل رہے گا، جس میں تعلیمی وظائف کے ذریعے نوجوان کھلاڑیوں کی مستقبل کی تعلیمی ضروریات کو پورا کرنے کی کوشش کی جائے گی۔
اس موقع پر چیئرمین پی سی بی محسن نقوی نے کہا:
"یہ معاہدہ نوجوان کرکٹرز کے لیے کھیل کے ساتھ ساتھ تعلیم میں کامیابی کی راہیں کھولے گا۔ ہم چاہتے ہیں کہ ہمارا ہر کرکٹر میدان کے ساتھ کلاس روم میں بھی روشن ستارہ بنے۔”
انہوں نے کہا کہ اس اقدام کے دور رس اثرات مرتب ہوں گے، اور پی سی بی تعلیمی وظائف کے دائرہ کار کو مزید وسعت دینے کا ارادہ رکھتا ہے تاکہ زیادہ سے زیادہ کھلاڑی اس سے فائدہ اٹھا سکیں۔
