اسلام آباد: پاکستان تحریک انصاف (پی ٹی آئی) کی رہنما علیمہ خان نے اسلام آباد ہائی کورٹ میں درخواست دائر کی ہے، جس میں انہوں نے پارٹی کے بانی اور سابق وزیراعظم عمران خان سے پاور آف اٹارنی پر دستخط کروانے کی اجازت طلب کی ہے۔
ایکسپریس نیوز کے مطابق، علیمہ خان کی جانب سے بیرسٹر سلمان صفدر اور دیگر وکلا کے ذریعے دائر کی گئی درخواست میں کہا گیا ہے کہ اڈیالہ جیل کے ڈپٹی سپرنٹنڈنٹ کے حوالے کی گئی دستاویزات، جن پر عمران خان کے دستخط کروانا ضروری ہیں، واپس نہیں کی جا رہی ہیں۔
درخواست میں مزید بتایا گیا کہ لاہور ہائی کورٹ نے ضمانت کی درخواستیں مسترد کر دی ہیں اور سپریم کورٹ میں اپیل دائر کرنے کے لیے عمران خان کے دستخط لازمی ہیں۔ علیمہ خان نے عدالت سے استدعا کی ہے کہ وہ پاور آف اٹارنی پر دستخط کروانے کی اجازت دے تاکہ مقررہ مدت کے اندر سپریم کورٹ میں اپیل دائر کی جا سکے۔
علیمہ خان کا مؤقف ہے کہ عدالتی حکام کو حکم دیا جائے کہ وہ عمران خان کو پاور آف اٹارنی پر دستخط کرنے کی مکمل اجازت دیں تاکہ قانونی کارروائی میں کوئی تاخیر نہ ہو اور پارٹی کے قانونی حقوق محفوظ رہیں۔
