واشنگٹن: امریکی صدر ڈونلڈ ٹرمپ نے ایک اہم اے آئی سمٹ میں خطاب کرتے ہوئے امریکی ٹیکنالوجی کی خودمختاری، قومی مفاد اور مقامی ملازمتوں کے فروغ پر زور دیا ہے۔ صدر ٹرمپ کا کہنا تھا کہ امریکہ کو ٹیکنالوجی کے میدان میں عالمی رہنما بننے کے لیے اپنی کمپنیوں کو ملکی مفاد کے ساتھ جوڑنا ہوگا۔
انہوں نے گوگل، مائیکروسافٹ سمیت دیگر بڑی کمپنیوں پر زور دیا کہ وہ بیرون ملک سے بھرتیوں کے بجائے امریکی شہریوں کو ترجیح دیں تاکہ مقامی ٹیلنٹ کو زیادہ سے زیادہ روزگار کے مواقع میسر آئیں۔
صدر ٹرمپ نے تین اہم ایگزیکٹو آرڈرز پر دستخط کیے، جن کے تحت:
ملک بھر میں ڈیٹا سینٹرز کی تعمیر میں تیزی آئے گی
ریگولیشنز کو آسان بنایا جائے گا
اور امریکہ کو مصنوعی ذہانت (AI) میں دنیا کا لیڈر بنانے کا جامع منصوبہ شروع ہوگا
انہوں نے یہ بھی اعلان کیا کہ جن کمپنیوں کو حکومتی فنڈنگ دی جائے گی، ان کے لیے لازم ہوگا کہ وہ ’’غیر جانبدار‘‘ اور ’’غیر سیاسی‘‘ اے آئی تیار کریں، تاکہ ٹیکنالوجی کا استعمال تمام امریکیوں کے لیے مساوی طور پر فائدہ مند ہو۔
صدر ٹرمپ نے مصنوعی ذہانت کو "جینیئس ٹیکنالوجی” کا نام دینے کی تجویز دی، تاکہ امریکی اختراع کو دنیا کے سامنے ایک منفرد اور طاقتور انداز میں پیش کیا جا سکے۔
ٹیک ماہرین کا کہنا ہے کہ ان اقدامات سے امریکی مارکیٹ میں مقامی ماہرین کو زیادہ مواقع ملیں گے، اور نیشنل ٹیکنالوجی انفراسٹرکچر مضبوط ہوگا۔ ساتھ ہی، اس پالیسی کے نتیجے میں امریکہ عالمی AI مارکیٹ میں مزید مضبوطی سے قدم جما سکتا ہے۔
