اسلام آباد (سیاسی رپورٹر) — پاکستان تحریک انصاف (پی ٹی آئی) کے چیئرمین بیرسٹر گوہر علی خان نے واضح کر دیا ہے کہ اب "مذاکرات کا وقت ختم ہو چکا ہے، آگے سب کچھ عمران خان کی ہدایات پر ہوگا۔”
انہوں نے یہ بات جوڈیشل کمپلیکس اسلام آباد میں میڈیا سے گفتگو کرتے ہوئے کہی۔ ان کا کہنا تھا کہ سینیٹ انتخابات خیبر پختونخوا میں خوش اسلوبی سے مکمل ہوئے، اور پارٹی کے تمام امیدوار مارچ 2024 میں ہی عمران خان کی مشاورت سے فائنل ہو چکے تھے۔
"ہمیں چھ سیٹیں ملی ہیں، یہ ہماری توقعات سے بہتر ہے۔”
مرزا آفریدی کا ٹکٹ، خان صاحب کی منظوری سے
بیرسٹر گوہر نے 9 مئی کے بعد پریس کانفرنس کرنے والے افراد کو ٹکٹ دیے جانے کی افواہوں کو رد کرتے ہوئے کہا کہ:
"مرزا آفریدی نے کبھی پارٹی کے خلاف بیان نہیں دیا، ان کا نام عمران خان نے خود فائنل کیا تھا۔ وہ ہمیشہ پارٹی بیانیے کے ساتھ کھڑے رہے۔”
عمران خان سے ملاقاتوں پر قدغن پر اظہار تشویش
انہوں نے شکایت کی کہ عمران خان سے ملاقات کی عدالتی اجازت کے باوجود پابندیاں برقرار ہیں۔ آخری ملاقات بیرسٹر سیف کی ہوئی، اس کے بعد صرف عمران خان کی بہنوں کو ملنے کی اجازت دی گئی، جس پر لوگوں میں شکوک و شبہات جنم لے رہے ہیں۔
تحریک کی قیادت جیل سے ہوگی
پی ٹی آئی چیئرمین نے کہا:
"عمران خان جیل سے خود احتجاجی تحریک کی قیادت کریں گے۔ اب پارٹی کی سمت اور فیصلے صرف انہی کی ہدایات کے مطابق طے پائیں گے۔”
آخر میں انہوں نے کہا کہ:
"دو سال سے پی ٹی آئی پر سختیاں جاری ہیں، اب وقت آ گیا ہے کہ سیاسی معاملات معمول پر آئیں۔”
