عمران خان کی بہنیں بھارتی چینلز پر ملک کو بدنام کر رہی ہیں، انہیں چلو بھر پانی میں ڈوب مرنا چاہیے: عطا تارڑ

لاہور: وفاقی وزیر اطلاعات عطا اللہ تارڑ نے کہا ہے کہ بانی پی ٹی آئی عمران خان کی بہنیں بھارتی اور افغان میڈیا پر جا کر ملک کو بدنام کر رہی ہیں، جو انتہائی افسوس ناک اور قابلِ مذمت عمل ہے۔ میڈیا سے گفتگو کرتے ہوئے انہوں نے کہا کہ پی ٹی آئی کی قیادت بیرون ممالک میں پاکستان مخالف بیانیے کو تقویت دے رہی ہے۔

عطا تارڑ کا کہنا تھا کہ عمران خان نے وزیراعظم شہباز شریف پر جھوٹے الزامات عائد کیے تھے اور عدالت میں پیش ہو کر ان الزامات کا سامنا کیا۔ ان کے مطابق عمران خان مختلف فورمز پر بھی یہی الزامات دہراتے رہے۔ انہوں نے کہا کہ بانی پی ٹی آئی کے تمام معاشی و سیاسی فیصلے ان کی اہلیہ کی جانب سے کیے جاتے تھے، جبکہ عالمی جریدے بھی اس ”نظامِ بہتان“ پر سوال اٹھا رہے ہیں۔

وفاقی وزیر اطلاعات نے 2017 کے دھرنوں کا حوالہ دیتے ہوئے کہا کہ اس وقت بھی عمران خان نے جھوٹے الزامات کی سیاست کو فروغ دیا۔ ان کا کہنا تھا کہ پی ٹی آئی کی سیاست ہمیشہ منافقت، بہتان اور غلط بیانی پر مبنی رہی ہے۔

وانا کیڈٹ کالج آپریشن پر پاک فوج کو خراجِ تحسین

عطا تارڑ نے وانا کیڈٹ کالج میں ہونے والے آپریشن کو سراہتے ہوئے کہا کہ پاک فوج نے اپنی مہارت اور بہادری سے 500 سے زائد طلبا کو بازیاب کرایا۔ انہوں نے کہا کہ یہ واقعہ اے پی ایس جتنے بڑے سانحے میں تبدیل ہوسکتا تھا، مگر بروقت کارروائی نے اسے ناکام بنا دیا۔

پی ٹی آئی پر ملک دشمن عناصر سے روابط کے الزامات

وفاقی وزیر نے الزام عائد کیا کہ پی ٹی آئی کے سوشل میڈیا اکاؤنٹس بھارت اور افغانستان سے چلائے جا رہے ہیں۔ انہوں نے کہا کہ یہ لوگ بیرونی سازشوں کا حصہ بن کر ملک میں عدم استحکام پیدا کرنے کی کوشش کر رہے ہیں۔ ان کے مطابق پی ٹی آئی کا مطالبہ غیر قانونی ہے اور مٹھی بھر لوگ روزانہ لا اینڈ آرڈر خراب کرنے کی کوشش کر رہے ہیں۔

انہوں نے صوبہ خیبر پختونخوا کی حکومت پر شدید تنقید کرتے ہوئے کہا کہ وہاں نان کسٹم پیڈ گاڑیوں، منشیات کے بڑھے ہوئے نیٹ ورکس اور غیر قانونی کان کنی پر کوئی کنٹرول نہیں۔ ان کا کہنا تھا کہ تمباکو مافیا اگر ٹیکس ادا کرے تو 500 ارب روپے سالانہ اکٹھے ہوسکتے ہیں، مگر کے پی کی حکومت کی کارکردگی صفر ہے۔

9 مئی کے واقعات اور فوج دشمن بیانیہ

عطا تارڑ نے دعویٰ کیا کہ بانی پی ٹی آئی کی بہنیں 9 مئی کو کور کمانڈر ہاؤس میں موجود تھیں، جس کے شواہد بھی موجود ہیں۔ انہوں نے کہا کہ بھارتی اور افغان چینلز پر جا کر اسی بیانیے کو فروغ دیا جا رہا ہے جس سے پاکستان کو بدنامی کا سامنا کرنا پڑتا ہے۔

انہوں نے کہا کہ 9 مئی کا حملہ فوج کو اندرونی طور پر کمزور کرنے کے لیے کیا گیا تھا، مگر یہ منصوبہ ناکام ہوا۔ ان کا کہنا تھا کہ پی ٹی آئی سیکیورٹی صورتحال سے توجہ ہٹانے اور مشرقی و مغربی سرحدوں کو کمزور کرنے کی کوشش کرتی رہی، مگر فوج کسی بھی جارحیت کا بھرپور جواب دینے کی صلاحیت رکھتی ہے۔