واشنگٹن (نیوز ڈیسک): سابق امریکی صدر ڈونلڈ ٹرمپ نے ایک اہم انکشاف کرتے ہوئے بتایا ہے کہ ماضی میں پاکستان اور بھارت کے درمیان شدید کشیدگی کے دوران پانچ جنگی طیارے مار گرائے گئے تھے اور دونوں ایٹمی طاقتیں ایک انتہائی خطرناک تصادم کے دہانے پر پہنچ چکی تھیں۔
یہ بات انہوں نے ریپبلکن سینیٹرز کے اعزاز میں دیے گئے ایک استقبالیہ سے خطاب کرتے ہوئے کہی۔ ان کے مطابق اُس نازک وقت میں انہوں نے ذاتی طور پر سفارتی مداخلت کرتے ہوئے نہ صرف جنگ کا خطرہ ٹالا بلکہ دنیا کو ممکنہ ایٹمی تباہی سے بچایا۔
ڈونلڈ ٹرمپ نے کہا:
"مجھے فخر ہے کہ میں نے دنیا بھر میں کئی جنگیں رکوانے میں کردار ادا کیا۔ پاک بھارت کشیدگی کے دوران صورتحال انتہائی تشویشناک تھی، اور میری مداخلت سے ایک بہت بڑا سانحہ ٹل گیا۔”
ٹرمپ کے اس بیان نے بھارتی مؤقف پر ایک بڑا سوالیہ نشان کھڑا کر دیا ہے، جبکہ پاکستان کے مؤقف کو عالمی سطح پر مزید تقویت حاصل ہوئی ہے۔ بھارتی میڈیا اور سرکاری بیانات کے برعکس، ٹرمپ کی جانب سے جنگی طیاروں کی تباہی کا اعتراف عالمی توجہ کا مرکز بن گیا ہے۔
بین الاقوامی تجزیہ کاروں کا کہنا ہے کہ یہ بیان جنوبی ایشیائی خطے میں جاری سفارتی بیانیے کو بدل سکتا ہے اور پاکستان کی خطے میں امن کے لیے کی جانے والی کوششوں کو عالمی سطح پر مزید تسلیم کیا جا سکتا ہے۔
