پشاور: خیبر پختونخوا کے وزیراعلیٰ علی امین گنڈاپور نے پولیس کو واضح ہدایات جاری کرتے ہوئے کہا ہے کہ وہ صرف میرٹ کو مدنظر رکھیں، کسی کی ناجائز سفارش قبول نہ کریں اور نہ ہی کسی قسم کے سیاسی یا طبقاتی دباؤ کو خاطر میں لائیں۔
’’میں نے آج تک کوئی سفارش نہیں کی‘‘
پشاور میں پولیس کے حوالے سے منعقدہ ایک تقریب سے خطاب کرتے ہوئے وزیراعلیٰ نے کہا:
"میں نے آج تک کوئی سفارش نہیں کی، آپ بھی صرف میرٹ دیکھیں۔ ہم سب نے اللہ کو جواب دینا ہے۔”
انہوں نے کہا کہ خیبر پختونخوا پولیس کی قربانیوں کی طویل تاریخ ہے، جس پر پوری قوم کو فخر ہے۔
پولیس بجٹ میں خاطر خواہ اضافہ
وزیراعلیٰ نے بتایا کہ پولیس کا سالانہ بجٹ 124 ارب روپے سے بڑھا کر 158 ارب روپے کر دیا گیا ہے تاکہ فورس کو جدید تقاضوں سے ہم آہنگ کیا جا سکے۔
مزید یہ کہ رواں سال کے دوران بلٹ پروف جیکٹس اور دیگر جدید ساز و سامان بھی فراہم کیا جائے گا۔
پولیس شہداء کے اہل خانہ کے لیے پلاٹس
وزیراعلیٰ نے ایک اہم اعلان کرتے ہوئے کہا:
"شہید اہلکاروں کی فہرست موصول ہو چکی ہے، ان کے خاندانوں کو پلاٹس دیے جائیں گے۔”
انہوں نے کہا کہ پولیس اہلکاروں کی جان و مال کے تحفظ کے لیے سرکاری خزانہ حاضر ہے۔
چار اضلاع میں سیف سٹی منصوبے پر کام جاری
علی امین گنڈاپور نے بتایا کہ خیبر پختونخوا کے چار اضلاع میں سیف سٹی پراجیکٹ پر تیزی سے کام جاری ہے، جس کا مقصد شہریوں کو جدید ٹیکنالوجی کی مدد سے تحفظ فراہم کرنا ہے۔
غریبوں پر نرمی، امیروں پر سختی — قانون سب کے لیے برابر
وزیراعلیٰ نے پولیس کو تلقین کی کہ وہ غریبوں کے چالان سے گریز کریں اور انہیں پہلے وارننگ دیں، مگر بڑی گاڑیوں یا بااثر افراد کے ساتھ کوئی رعایت نہ برتی جائے۔
"بڑی گاڑی والوں کو پیغام دیں کہ انہوں نے قانون توڑا ہے۔ قانون سب کے لیے برابر ہے۔”
