وزیراعظم شہباز شریف نے بدھ کو وفاقی کابینہ کا اہم اجلاس طلب کر لیا

اسلام آباد: وزیراعظم شہباز شریف نے بدھ کے روز وفاقی کابینہ کا اہم اجلاس طلب کر لیا ہے، جس میں ملک کی مجموعی امن و امان کی صورتحال سمیت کئی اہم امور پر غور کیا جائے گا۔

ذرائع کے مطابق اجلاس میں فرنٹیئر کانسٹیبلری (ایف سی) کو "فیڈرل کانسٹیبلری” کا نام دینے کی تجویز پیش کی جائے گی، اور اس ادارے کے دائرہ کار کو پورے ملک تک وسعت دینے کے حوالے سے مشاورت کی جائے گی۔ یہ قدم ادارہ جاتی اصلاحات اور قانون نافذ کرنے والے اداروں کی صلاحیت بڑھانے کے سلسلے میں حکومت کی اہم پیش رفت کے طور پر دیکھا جا رہا ہے۔

اجلاس میں قومی سلامتی کے دیگر اہم معاملات اور ممکنہ پالیسی فیصلوں پر بھی تفصیلی تبادلہ خیال متوقع ہے۔

یہ اجلاس ملکی استحکام اور ترقی کے لئے حکومتی اقدامات کو مزید مؤثر بنانے کی کوششوں میں ایک اہم سنگ میل ثابت ہو گا۔